Կբարեկարգվի դեպի Վրաստան միջպետական ճանապարհը
БЛОГՎլադ Կարախանյանը ֆեյսբուքյան իր էջում գրում է.
Կառավարության ս.թ. հունիսի 16-ի նիստի օրակարգում է «Մ-6, Վանաձոր- Ալավերդի-Վրաստանի սահման միջպետական ճանապարհի վերականգնման և բարելավման ծրագրով հաղորդակցուղիների տեղափոխման նախագծային աշխատանքների և տեխնիկական հսկողության ծառայության գնման գործընթացներ կազմակերպելու մասին» որոշման նախագիծը: Ծրագրի նպատակն է հիմնանորոգել և արդիականացնել Հայաստանի Հանրապետությունը Վրաստանի հետ կապող շուրջ 90 կմ երկարությամբ հիմնական տարանցիկ մայրուղին, որի նախնական արժեքը 102 մլն եվրո է: Նախատեսվում է շինարարությունն իրականացնել 36 ամսում` 2017-2020թթ. ընթացքում:
Ճանապարհի վերականգնման նախագծանախահաշվային փաստաթղթերը չեն ներառել ճանապարհին եղած հաղորդակցուղիների`- գազատար, կապի մալուխ, ջրագիծ,-տեղափոխման աշխատանքը, ուստի այն ընդգրկվել է ծրագրի գնումների բաժնում և Եվրոպական ներդրումային բանկի հետ համաձայնեցվել, որպեսզի գործը կազմակերպվի ՀՀ գնումների օրենսդրությամբ նախատեսված ընթացակարգերով:
Միաժամանակ նկատի առնելով այն հանգամանքը, որ ՀՀ 2016թ. պետբյուջեով արդեն իսկ նախատեսված են համապատասխան ֆինանսական միջոցներ Մ-6, Վանաձոր-Ալավերդի-Վրաստանի սահման միջպետական նշանակության ճանապարհի վերականգնման և բարելավման ծրագրով, նախատեսվում է գնման ընթացակարգերի արդյունքում կնքվող պայմանագրերի վճարումն իրականացնել ՀՀ 2016թ. պետբյուջեով նախատեսված միջոցներից` ՀՀ տրանսպորտի և կապի նախարարության «Տրանսպորտի ծրագրերի իրականացման գրասենյակ» պետական հիմնարկի կողմից:
Որոշման նախագծի ընդունմամբ հնարավոր կլինի ճանապարհի շինարարությանը զուգընթաց իրականացնել ճանապարհի հաղորդակցուղիների տեղափոխումը` ապահովելով նաև պատշաճ տեխնիկական հսկողությունը: