Ադրբեջանցի նախարարը` «Ֆորմուլա-1»-ի համար Ալոնսոյին 2 մլն դոլար տալու մասին

Ադրբեջանի երիտասարդության եւ սպորտինախարար Ազադ Ռահիմովը խոսել է այսօր Բաքվում սկսված «Ֆորմուլա-1» մրցարշավի անցկացման վրա կատարված ծախսերի մասին:

Վկայակոչելով virtualaz.org լրատվական կայքը, Ռահիմովն անդրադարձել է նաեւ Իսպանիայի Marca հրատարակության կողմից այն պնդմանը, որ «Ֆորմուլա-1» մրցարշավը Բաքվում անցկացվելու համար Ադրբեջանը 80 մլն դոլար է վճարել, իսկ լեգենդար մրցարշավորդ Ֆերնանդո Ալոնսոին` 2 մլն դոլար, որպեսզի նա հանդես գա որպես մրցումների պաշտոնական դեսպան:

«Բազմիցս հայտնել եմ, որ մրցարշավի երթուղու ասֆալտի ծածկույթը փոխելու վրա ծախսվել է 12 մլն մանաթ: «Ազադլըգ» հրապարակում մրցարշավի համար շենք գնելու վրա` 20 մլն մանաթ: Քաղաքում հատուկ շինություններ են կառուցվել, այլ աշխատանքներ են կատարավել: Ալոնսոյին այդքան փող ոչ ոք չի տվել: Սակայն, ընդհանուր առմամբ, պետությունն ու բոլոր հովանավորները 100 մլն մանաթ փող են ծախսել», -ասել է նա:

Ադրբեջանում Եվրոպայի Գրան Պրի «Ֆորմուլա-1» մրցարշավները իրար հետեւից պետք է անցկացվեն 5 տարի շարունակ: Հակառակ դեպքում` Ադրբեջանը հարկադրված կլինի 100 մլն դոլար տուգանք վճարել:

Ադրբեջանցի նախարարը հույս է հայտնել, որ մրցարշավի վրա կատարված ծախսերը մասնակիորեն հնարավոր կլինի փոխահատուցել մրցումների շրջանում Բաքու այցելող զբոսաշրջիկների հաշվին: Նա նշել է, որ արդեն 2 մլն մանաթի տոմսեր են վաճառվել:

Ադրբեջանի ընդդիմադիր կուսակցությունները գտնում են, որ պետության փողերը պետք է ծախսել ոչ թե նման մրցումների, այլ տնտեսական բարեփոխումների եւ բնակչության սոցիալական խնդիրների լուծման վրա:

Meydan TV հեռուստաալիքի կայքն ավելի վաղ հայտնել էր, որ Բաքվում հունիսի 17-19-ին անցկացվելիք «Ֆորմուլա-1» մրցարշավը Ադրբեջանի հեղինակությունը բարձրացնելու Իլհամ Ալիեւի վարչակարգի հերթական ձախողված նախագիծն է: Այն ներկայացվում է որպես մի նախագիծ, որը պետք է բարձրացնի երկրի եւ նրա մայրաքաղաքի հեղինակությունը, ինչպես նաեւ խթանի արտասահմանյան զբոսաշրջիկների ներհոսքը: Սակայն, Եվրատեսիլ-2012 եւ Առաջին (եւ վերջին) Եվրոպական խաղերի վրա բազմամիլիոն եւ անգամ միլիարդավոր ծախսերն այդպես էլ չեն բերել Ադրբեջանի նկատմամբ արտասահմանյան տուրիստների աճին:

Կայքը համոզմունք է հայտնել, որ «Ֆորմուլա-1»-ը հանդիսանում է Ալիեւի ռեժիմի վոլյունտարիզմի խորհրդանիշը:

««Ֆորմուլա-1»-ը հանդիսանում է որոշումների ընդունման գործում Ադրբեջանի ներկայիս ռեժիմին հատուկ վոլյունտարիզմի դրսեւորման խորհրդանիշ: Ադրբեջանում նման շոուների անցկացման մասին ոչ մի որոշում թափանցիկ` լայն եւ անգամ նեղ հասարակական քննարկում չի անցել: Հանուն այդ մրցարշավի անցկացման երեք օրերի, իշխանություններն անգամ չեղյալ են հայտարարել ամառային ժամանակին անցումը, մրցումներն էլ անցկացվում են ոչ թե ազգային, այլ Եվրամիության դրոշի տակ: Միանաշանակ, այդ միջոցառումը ոչ մի կապ չունի պետության, առավել եւս` հասարակության հետ, այլ հան դիսանում է ռեժիմի եւ «Ֆորմուլա-1»-ի կոմերցիոն տերերի ձախողված նախագիծ», -գրում է կայքը` ամփոփելով, որ Ադրբեջանի համար «Ֆորմուլա-1»-ը միայն ավտորիտարիզմի, խորթանալու եւ երկրի ինքնամեկուսացման հերթական արմատավորումն է:

Միջազգային իրավապաշտպան Freedom House կազմակերպությունը Բաքվում անցկացվելիք «Ֆորմուլա-1» Եվրոպայի Գրան Պրի մրցարշավը մեկնաբանելու մեկնած լրագրողներին կոչ է արել ուշադրություն դարձնել Ադրբեջանի կառավարության ռեպրեսիվ քաղաքականությանը:

«Բաքու մեկնող լրագրողներին, կորպորատիվ հովանավորներին մենք կոչ ենք անում ուշադրություն դարձնել մրցումների շքեղության հետեւում 80-ից ավելի քաղաքական ակտիվիստների, մարդու իրավունքների պաշտպանների եւ ԶԼՄ-ների թղթակիցների անհիմն ձերբակալությունների հետ միասին կառավարության  ռեպրեսիվ քաղաքականությանը», այդ առնչությամբ տարածած հայտարարության  մեջ նշել է Freedom House-ի փոխնախագահ Դենիել Կալինգաերթը:

Ադրբեջանի կոռումպացված իշխանությունները գտնում են, որ «Եվրատեսիլ», «Եվրոպայի խաղեր», «Ֆորմուլա» միջազգային միջոցառումներ կազմակերպելով կարող են բարձրացնել իրենց հեղինակությունն ու վարկանիշը: Նման միջոցառումների ժամանակ իշխանությունները Բաքվից հավաքում են արտասահմանցու աչքի համար «ոչ բարետես» ամեն ինչ: Օրինակ` «Եվրատեսիլ» երգի միջազգային մրցույթի ժամանակ Բաքվի կենտրոնական փողոցներից, օդանավակայանից մինչեւ Բաքու մայրուղուց հավաքել էին Ադրբեջանի «համազգային առաջնորդ» Հեյդար Ալիեւի եւ նրա որդու ` նախագահ Իլհամ Ալիեւի դիմապատկերներով պաստառները՝ փորձելով թաքցնել նրանց նկատմամբ անձի պաշտամունքի առկայությունը երկրում:

Բաքվում անցկացվելիք «Ֆորմուլա-1» մրցումների հետ կապված՝ իրավապահ մարմինները Ադրբեջանի մայրաքաղաքից հավաքել են մուրացկանությամբ զբաղվող անձանց եւ ուղարկել իրենց մշտական գրանցման շրջաններ: Նավթի եւ մանաթի խիստ էժանացման պատճառով խոր տնտեսական ճգնաժամում հայտնված Ադրբեջանի շրջաններից աղքատության շեմից ցածր կենսամակարդակ ունեցող հազարավոր մարդիկ եւ երեխաներ Բաքվի փողոցներում մուրացկանությամբ աշխատում են գոյություն պահպանել: 

Ադրբեջանական ԶԼՄ-ներն ավելի վաղ հայտնել էին, որ «Ֆորմուլա-1»-ը Բաքվում անցկացնելու համար Ադրբեջանը միջազգային կառույցին 50 մլն դոլար է վճարել, իսկ խաղերի անցկացման վրա, փորձագետների կարծիքով, ընդհանուր ծախսերը կազմել են 150 մլն դոլար: