«Եվրո 2016». Ռոնալդուն միայնակ Պորտուգալիային բարձրացնում է 3-րդ տեղ

СПОРТ 22 Июнь, 2016 22:32

«Եվրո 2016»-ի վերջին F խմբում պայքարը հասավ իր գագաթնակետին: Եվրոպայի առաջնության ամենագեղեցիկ հանդիպումը տեղի ունեցավ Լիոնում: «Արմենպրես»-ը հաղորդում է, որ Պորտուգալիա-Հուգարիա խաղն ավարտվել է` 3-3 հաշվով:

Պորտուգալիա. Պատրիսիու, Պեպե, Ռ. Կարվալյու, Ռոնալդու, Մոուտինյու, Մարիու, Վիեյրինյա, Վ. Կարվալյու, Գոմեշ, Նանի, Էլիզեու

Հունգարիա. Կիրայ, Լանգ, Յուխաշ, Գուզմիչ, Կորհուտ, Պինտեր, Էլեկ, Լովրենչիչ, Գերա, Ջուջակ, Սալաի

Գլխավոր մրցավար` Մարտին Ատկինսոն:

Հունգարիա Պորտուգալիա հանդիպման 1-ին խաղակեսը միտում ուներ դառնալ հերթական սենսացիան «Եվրո 2016»-ում: Պորտուգալիայի հավաքականին հաջորդ փուլ դուրս գալու համար հաղթանակ է անհրաժեշտ: Պորտուգալիան հենց ամենասկզբից տիրեց խաղային առավելությանը, սակայն վտանգավոր գրոհներ այդպես էլ կազմակերպել չկարողացավ: Հունգարիայի ընտրանին առաջին իսկ վտանգավոր գրոհով կարողացավ արդյունքի հասնել: 19-րդ րոպեին գոլի հեղինակ դարձավ Զոլտան Գերան: Հունգարիայի հավաքականը շարունակեց գործել հակագրոհներով և 24-րդ րոպեին կարող էր կրկին հասնել արդյունքի: Պորտուգալիան այս դրվագում էլ փրկվեց: Պորտուգալիայի հավաքականը առաջին իրական հնարավորությունը ունեցավ միայն 29-րդ րոպեին: Հունգարիայի հավաքականի վետերան դարպասապահ Գաբոր Կիրայը գեղեցիկ ցատկով հեռացրեց գնդակը Քրիշտիանու Ռոնալդուի տուգանային կրակոցից հետո: Պորտուգալիան շարունակեց գրոհել և 42-րդ րոպեին գոլի հեղինակ դարձավ Նանին: Փոխանցումը ոսկերչական ճշտությամբ կատարեց Ռոնալդուն: 1-ին կեսը ավարտվեց 1-1 հաշվով:

2-րդ խաղակեսի մեկնարկը գերազանցեց ֆուտբոլասերների սպասելիքները: Հունգարիայի հավաքականը 47-րդ րոպեին ստացավ տուգանային հարվածի իրավունք: Գնդակին մոտեցավ Բալաշ Ջուջակը, որի հարվածից հետո գնդակը դիպավ Անդրե Գոմեշին և հայտնվեց Պորտուգալիայի դարպասում: Պորտուգալիան հաջորդ իսկ վտանգավոր գրոհով հավասարեցրեց հաշիվը: Ռոնալդուն 50-րդ րոպեին կրունկի ֆանտաստիկ հարվածով գրավեց Հունգարիայի դարպասը ` 2-2: Ռոնալդուն տարերքի մեջ էր: Պորտուգալիան չհասցրեց նշել հաջողությունը և Հունգարիան կրկին հասավ հաջողության: Բալաշ Ջուգակը տուգանայինից հարվածեց, գնդակը ետ մղվեց, Ջուջակը տիրեց գնդակին, հարմարեցրեց և անորսալի հարվածով կրկին գնդակահարեց Պորտուգալիայի դարպասը` առաջ մղելով իր թիմին`3-2: Հունգարիան քանդում էր Պորտուգալիային, սակայն Քրիշտիոնու Ռոնալդուն անկոտրուն էր: «Ռեալ»-ի առաջատարը պատասխանեց բոլոր քննադատներին 62-րդ րոպեին: Ռոնալդուն, ստանալով թիմակցի փոխանցումը, դուբլ գրանցեց իր օգտին ` գլխով ուղարկելով գնդակը Հունգարիայի դարպասը: Իսկ Հունգարիայի պատասխանը կրկին ավելի քան վտանգավոր էր: Պորտուգալիան փրկվեց 64-րդ րոպեին՝ դարպասաձողի օգնությամբ: Պորտուգալիան ուժեղացնելով հարձակումը 76-րդ րոպեին՝ ուներ հերթական հնարավորությունը: Ռոնալդուն 76-րդ րոպեին վրիպեց նպաստավոր դիրքից: Հետագայում Ֆեռնանդու Սանտուշի թիմը կրկին տիրեց նախաձեռնությանը, սակայն ավելին անել չկարողացավ: Պորտուգալիան գրավեց խմբում 3-րդ տեղը և կսպասի E խմբի պայքարի ավարտին, որից հետո պարզ կդառնա այս հավաքականի ճակատագիրը: 1-ին տեղը խմբում զբաղեցրեց Հունգարիան` վաստակելով 5 միավոր: