Աղձք համայնքն իր մանկապարտեզը կունենա

Աղձքի միջնակարգ դպրոցին պատկանող 59 քառ. մետր մակերեսով արհեստանոցը եւ 6.8 քառ. մետր մակերեսով զուգարանը, ինչպես նաեւ դրանց օգտագործման ու սպասարկման համար անհրաժեշտ 0.2638 հա հողամասը հետ կվերցվի եւ կնվիրաբերվի համայնքին՝ համայնքային մանկապարտեզ կառուցելու նպատակով:

Այս մասին որոշում կկայացվի վաղը՝ Կառավարության հերթական նիստի ընթացքում: Որոշման նախագիծը կներկայացնի ՀՀ կառավարությանն առընթեր պետական գույքի կառավարման վարչության պետ Արման Սահակյանը:

Ըստ նախագծի՝ մինչև 2016 թվականի դեկտեմբերի 1-ը նվիրաբերվող տարածքում «Հայաստան համահայկական հիմնադրամի» միջոցով կկառուցվի մանկապարտեզ, որի նախագծա-նախահաշվային արժեքը կազմում է 128 միլիոն դրամ:

Ինչպես տեղեկանում ենք նախագծից, ՀՀ կառավարությանն առընթեր պետական գույքի կառավարման վարչություն է դիմել Աղձք համայնքի ղեկավարը` Արսեն Ավդալյանը, տեղեկացնելով, որ իրենց համայնքն ունի շուրջ 1975 բնակիչ: «Աղձքում է գտնվում Արշակունի թագավորների դամբարանը, գյուղի միջնակարգ դպրոցում սովորում է շուրջ 198 երեխա: Սակայն գյուղը չունի մանկապարտեզ, ուստի գյուղի դպրոցին պատկանող տարածքից համայնքի կարիքների համար անհրաժեշտ է մոտ 0.25 հա մակերեսով հողամաս՝ մանկապարտեզ կառուցելու համար»,- հայտնել է գյուղապետը:

Ըստ նախագծի՝ մանկապարտեզի կառուցման աշխատանքները նախատեսվում է ավարտել 2016 թվականի աշնանը, իսկ Աղձքի նորակառույց մանկապարտեզ կհաճախեն երեխաներ նաեւ հարեւան Ագարակ, Օրգով եւ Տեղեր համայնքներից:

Քրիստինա Տեր-Մաթեւոսյան