Անասնաբուժական կենտրոնների կառավարումը կիրականացնի «Ագրոբիզնեսի եւ գյուղի զարգացման կենտրոն» հիմնադրամը

Ճամբարակում գտնվող անասնաբուժական սպասարկման կենտրոնը կհատկացվի «Ագրոբիզնեսի եւ գյուղի զարգացման կենտրոն» հիմնադրամին:

Այս որոշման նախագիծը ներառված է կառավարության վաղվա նիստի օրակարգում: Ինչպես գրված է նախագծում՝ «Հայաստանի Հանրապետության գյուղատնտեսության նախարարության աշխատակազմ» պետական կառավարչական հիմնարկին ամրացված, 2015թ. կառուցված 44 միլիոն 987 հազար 330 դրամ արժեքով Գեղարքունիքի մարզի Ճամբարակ համայնքի, Գ. Նժդեհի փողոցի 1/3 հասցեում գտնվող 205,4 քառ. մետր մակերեսով անասնաբուժական սպասարկման կենտրոնի շենքը անժամկետ, անհատույց օգտագործման իրավունքով հանձնել «Ագրոբիզնեսի եւ գյուղի զարգացման կենտրոն» հիմնադրամին:

Ըստ նախագծի՝ անասնաբուժական սպասարկման կենտրոնի շենքի ընդհանուր յոթ միլիոն 186 հազար 282 դրամ արժողությամբ անվտանգության համակարգը, գրասենյակային կահույքը եւ անասնաբուժական սարքերը, ինչպես նաեւ «Ռենո-Դոկկեր» մակնիշի 4 հատ ավտոմեքենան՝ յուրաքանչյուրի արժեքը յոթ միլիոն 260 հազար դրամ, անհատույց օգտագործման իրավունքով կհանձնվի «Ագրոբիզնեսի եւ գյուղի զարգացման կենտրոն» հիմնադրամին:

Նախագծում ասված է, որ հանրապետության անասնապահությամբ զբաղվող համայնքներում առկա են կենդանիների առողջության պահպանման, վարակիչ հիվանդությունների կանխարգելման, արհեստական սերմնավորման, ինչպես նաեւ` գործող անասնաբույժների որակավորման բարձրացման, աշխատանքների համակարգման եւ նրանց անհրաժեշտ տեխնիկայով, սարքավորումներով ու գործիքներով ապահովման խնդիրներ:

ՀՀ գյուղատնտեսության նախարարության «Գյուղատնտեսական ծրագրերի իրականացման գրասենյակ» պետական հիմնարկի կողմից իրականացվող «Համայնքների գյուղատնտեսական ռեսուրսների կառավարման և մրցունակության» ծրագրի շրջանակներում Հայաստանի Հանրապետության Գեղարքունիքի մարզի Ճամբարակի համայնքում կառուցվել է անասնաբուժական սպասարկման կենտրոնի շենք, կենտրոնի համար ձեռք են բերվել անհրաժեշտ անասնաբուժական սարքավորումներ ու գործիքներ եւ կահավորման համար անհրաժեշտ այլ գույք, որը ժամանակավոր պահատվության է հանձնվել «Ագրոբիզնեսի և գյուղի զարգացման կենտրոն» հիմնադրամին: Ծրագրերի շրջանակներում ձեռք է բերվել նաեւ անասնաբուժական ծառայություններ մատուցելու համար հատուկ հարմարեցված «Ռենո-Դոկկեր» մակնիշի 4 ավտոմեքենա, որոնք նախատեսված են Սյունիքի մարզի Խնձորեսկի, Արագածոտնի մարզի Արտաշավանի, Գեղարքունիքի մարզի Ճամբարակի համայնքներում կառուցված, ինչպես նաեւ Տավուշի մարզի Բերդի համայնքում կառուցվող անասնաբուժական սպասարկման կենտրոնների համար:

Ինչպես տեղեկանում ենք նախագծից՝ թվարկված խնդիրների լուծման գործում «Ագրոբիզնեսի եւ գյուղի զարգացման կենտրոն» հիմնադրամի ունեցած պրակտիկ մեծ փորձը հաշվի առնելով` Համաշխարհային բանկի առաջարկությամբ պայմանավորվածություն է ձեռք բերվել հիմնադրամի հետ` անասնաբուժական սպասարկման կենտրոնների կառավարումը հիմնադրամի կողմից իրականացնելու մասին:

Նախագիծը մշակվել է ՀՀ գյուղատնտեսության նախարարության աշխատակազմի եւ «Գյուղատնտեսական ծրագրերի իրականացման գրասենյակ» պետական հիմնարկի կողմից: Կառավարության նիստին այն կներկաայցնի գյուղատնտեսության նախարար Սերգո Կարապետյանը:

Ծրագրի արդյունքում ակնկալվում է հանրապետության չորս մարզի 40 եւ ավելի համայնքում գործող անասնաբույժների հասանելիություն անասնաբուժական սպասարկման կենտրոնների ծառայություններին, սարքավորումներին ու գույքին: Ինչպես նաեւ անասնաբույժների շարունակական ուսուցում, խորհրդատվություն, գործող անասնաբույժների՝ ոլորտի նորարարությունների , արտասահմանյան փորձի մասին տեղեկացված լինելը:

 

Քրիստինա Տեր-Մաթեւոսյան