«Ապրել խաղաղ» նախագծի պատանի մասնակիցները երգով հիշեցին մեր հերոսներին (տեսանյութ)

Հուլիսի 19-ին Պարոնյանի անվան երաժշտական կոմեդիայի թատրոնում տեղի ունեցավ «Ապրել խաղաղ» խորագրով համերգային ծրագիրը, որը նախաձեռնել էր «Ապրել խաղաղ» նախագիծը: Համերգային ծրագիրը նվիրված էր սահմանին կանգնած զինվորին: Միջոցառմանը ներկա էին ապրիլյան պատերազմում զոհված հերոսների ծնողները:

Past.am-ի հետ զրույցում «Ապրել խաղաղ» նախագծի հեղինակ Լիլի Գրիգորյանն անդրադարձավ մտահղացմանն ու դրա իրականացման հետ կապված հարցերին: Վերջինս մեզ պատմեց, որ նախագիծն իրականացրել են 2015 թվականից՝ այն նվիրելով Հայոց ցեղասպանության հարյուրամյակին:

Լիլին նաև «Ապրել խաղաղ» երգի հեղինակն է, որի տեսահոլովակը մեծ տարածում ունեցավ համացանցում և հեռուստատեսությամբ, իսկ երգը, ըստ նրա, շատ սիրվել է: Հեղինակի խոսքով՝ դա հայ երեխաների խաղաղության կոչն էր աշխարհին: «Որոշեցինք նաև ունենալ համանուն՝ «Ապրել խաղաղ» համերգային ծրագիր, որը ոչ միայն խաղաղության կոչ պետք է լինի, այլև նվիրվելու է հայրենիքի զինվորին:

Երբ եղավ ապրիլյան պատերազմը, մենք հասկացանք, որ այս համերգը միայն մեր ցանկությունը չէ, դա անհրաժեշտություն է: Համերգային ծրագրին մասնակցում են 12-17 տարեկան պատանիներ, որոնք պետք է գիտակցեն սահմանին կանգնած զինվորի արժեքը, գոնե տեսնեն այն հերոսների լուսանկարները, որոնց շնորհիվ ունենք ապրելու հնարավորություն: Բայց ունենք նաև մեր ամենափոքր մասնակիցը՝ 5-ամյա Եվան, որը տեսահոլովակի խաղաղության լույսն է: Մյուս երեխաներն ավելի հասուն են»,- պատմեց Լ. Գրիգորյանը:

Համերգի ընթացքում տեղի ունեցավ նաև Լիլի Գրիգորյանի հեղինակային «Հերոս մարտիկ» երգի պրեմիերան: Երգը կատարեցին «Ապրել խաղաղ» նախագծի մասնակիցները: Լիլին նշեց, որ ստեղծագործությունը նվիրված է բոլոր հերոսներին, որոնք իրենց կյանքն են զոհել վերջին տարիներին: Հանդիսատեսը հոտնկայս ծափահարեց, երբ երգի ժամանակ էկրանին հայտնվեցին հերոսների նկարները: «Ամենակարևորը դաստիարակչական ուղղվածությունն է, որը փորձեցինք տալ համերգին ես և երաժշտական մասի ղեկավար Լիլիթ Բադալյանը:

Համերգը երեք բաժնից էր բաղկացած՝ զինվորի մասին երգեր, հայրենիքի մասին ստեղծագործություններ և Երևանի մասին: Եզրափակեցինք «Ապրել խաղաղ» երգով, այսինքն՝ լավատեսական ոգին պահեցինք՝ հիշեցնելով, որ ապագան այս սերնդի ձեռքերում է, նրանք չեն մոռանա այսօրվա հերոսներին»,- ընդգծեց նախագծի հեղինակը:

Լիլի Գրիգորյանը հայտնեց, որ պատրաստվում են նկարահանել «Հերոս մարտիկ» երգի տեսահոլովակը: Նա հույս ունի, որ մինչև աշուն կհասցնեն այդ աշխատանքները: Նպատակներրից է նաև Ստեփանակերտում համերգ տալը: «Քանի որ հեռավոր մարզերի բնակիչ հանդիսացող զոհված զինվորների հարազատները չկարողացան ներկա գտնվել համերգին, որոշեցինք Ստեփանակերտում էլ համերգ ունենալ, որպեսզի նրանք էլ կարողանան ներկա լինել»,- նշեց Լիլին՝ հավելելով, որ սա դժվար թե լինի սփոփանք, բայց ուզում են փառաբանել զոհված տղաներին: «Ապրել խաղաղ» նախագծի հեղինակը շնորհակալություն է հայտնում ՀՀ պաշտպանության նախարարությանը, Հայաստանի պետական ֆիլհարմոնիային՝ տնօրեն Գագիկ Մանասյանի գլխավորությամբ, «Արմենիա» հեռուստաընկերությանը, մասնավորապես Արթուր Ջանիբեկյանին և Մանվել Հովհաննիսյանին, HI-AM բարեգործական հիմնադրամի նախագահ Նշան Աճեմյանին, Հակոբ Պարոնյանի անվան թատրնոնի ղեկավարությանը:

Լևոն Փանոսյան