«Թոր Հեյերդալ» հետազոտական արշավախումբը համախմբել է հետազոտող պատանիների Հայաստանից եւ Ռուսաստանից

Հայաստանում մեկնարկել է նորվեգացի ճանապարհորդ եւ գիտնական Թոր Հեյերդալի անունը կրող հետազոտական արշավախմբի արշավը` համախմբելով  11 պատանի հետազոտողների Հայաստանից եւ Ռուսաստանից: Ծրագրի նախաձեռնողը ծովային կենսաբան, Նորվեգիայի Կոն-Տիկի թանգարանի  հատուկ խորհրդական Թոր Հեյերդալ Կրտսերն է` նորվեգացի հայտնի գիտնականի որդին: Տասն օր տևող արշավի ընթացքում արշավախմբի անդամներն այցելելու են հյկական քաղաքներ, գյուղեր, թանգարաններ, հին վանքեր, ուսումնասիրելու են ռուսական եւ հայկական մշակույթը:  

Նորվեգացի ճանապարհորդ եւ գիտնական Թոր Հեյերդալի անունը կրող հետազոտական արշավախմբի անդամներին ընդունեց ՀՀ-ում Ռուսաստանի դեսպան Իվան Վոլինկինը: ՌԴ դեսպան Իվան Վոլինկինի խոսքով` Հայաստանը լի է պատմամշակութային վայրերով, որոնք այնպայման պետք է տեսնել:

«Թեպետ Հայաստանը փոքր երկիր է, բայց այն հարուստ է պատմամշակութային վայրերով: Երեք տարի է, ինչ այստեղ եմ, սակայն ինքս չեմ հասցրել ամբողջությամբ այցելել այդ վայրերը:  Այստեղ շատ են հին եկեղեցիները, խաչքարերը, որոնց անպայման պետք է ծանոթանալ, սակայն երկրի ամենամեծ հարստությունն բացառիկ ժողովուրդն է, որը շատ դժվարությունների միջով է անցել. այն միշտ բաց է հաղորդակցման համար, ընկերասեր եւ հյուրընկալ»,-նշեց դեսպանը:

Ծրագրի հատուկ հյուր, Կոն-Տիկի թանգարանի նախկին գիտաշխատող Հալֆդեն Թանջենը, ով դասախոսություն է ունենալու նորվեգացի գիտնականի ուսումնասիրությունների եւ դրանց ազդեցության վերաբերյալ, ուրախ է, որ պատանիները հենց Հայաստանն են բացահայտելու:

«Մենք ուզում էինք ընտրել այնպիսի մարդկանց, ովքեր ցանկանում են միասին աշխատել, ինչ-որ բան անել: Ես շատ եմ սիրել այս երկիրը, պատմությունը:  Սա նաեւ առաջին քրիստոնյա երկիրն է, եւ այս ճամբարի համար սա շատ լավ սկիզբ է, քանի որ մենք խոսելու ենք ամեն ինչից` կրոն, խոհանոց եւ այլն»,- «Արմենպրես»-ի հետ զրույցում նշեց նա:

Ռուսական աշխարհագրական համայնքի Նովոսիբիրսկի մասնաճյուղի երիտասարդական բաժնի պատասխանատու Եկատերինա Վրոնսկայան տեղեկացրեց, որ հաջորդ տարի արշավը կազմակերպվելու է Նովոսիբիրսկում:

«Մեր նպատակն է ներգրավվել ակտիվ երիտասարդների տարբեր երկրներից, որպեսզի նրանք ստեղծեն այդ մշակութային, գիտական կամուրջները երկրների միջեւ, ծանոթանան պատմական արժեքներին, մշակութային առանձնահատկություններին: Նրանք կհասկանան, որ ամեն մի երկիր ունի իր ավանդույթներն ու արժեքները, որոնք  պետք է հարգվեն: Շատ կարեւոր է, որ այցելելու ենք նաեւ այնպիսի վայրեր, որտեղ ծնվել են հայ ժողովրդի մեծերը, այսինքն` պատանիները կճանաչեն նաեւ այս ազգի հայտնի դեմքերին` ավելի խորը ուսումնասիրելով հայ մշակույթը»- նշեց Եկատերինա Վրոնսկայան:

Արշավախմբում ներգրավված 12-16 տարեկան պատանիները խորը գիտելիքներ ունեն տարբեր առարկաներից` կենսաբանություն, պատմություն, բնապահպանություն  եւ այլն: Ալեքսանդր Վրոնսկին ուսումնասիրում է բնապահպանության ոլորտը եւ մշակում  է բնապահպանական մի ծրագիր:

«Ես կցանկանայի, որ չլինեին բնապահպանական աղետներ, եւ տարբեր երկրների մարդիկ միավորվելով ուղղորդեին իրենց ջանքերը բնության պահպանմանը»,-ընդգծեց Ալեքսանդրը:

Հարություն Ռեգանյանը Վաղարշապատից է, նա  տարիներ շարունակ ապրել է ԱՄՆ-ում,  սակայն վերադարձել է իր հայրենի քաղաք: Նա նույնպես հետաքրքրված է նորվեգացի  ճանապարհորդի ուսումնասիրություններով: