Սահմանամերձ Դովեղում և Բերդավանում դպրոցն է գյուղի պահպանման անկյունաքարը

Ուսուցիչ աշխատելն առաքելություն է, որը կրկնակի դժվար է դառնում սահմանապահ գյուղերում: Տավուշի մարզի բազմաթիվ գյուղերի ուսուցիչներ ամեն օր սխրանք են գործում՝ աշխատելով հակառակորդի հավանական կրակի տակ, ապագա սերունդներին փոխանցելով գիտելիքներ ու արժեքներ: Այստեղի կրթական հիմնախնդիրները պայմանավորված են տարածաշրջանի ռազմավարական կարևորությամբ: 

Տավուշի մարզ կատարած այցի ընթացքում նման տեսակետ հայտնեց ՀՀ կրթության և գիտության նախարար Արմեն Աշոտյանը:

Նախարարն, օգոստոսի 24-ին այցելեց սահմանամերձ Դովեղ և Բերդավան գյուղեր՝ ծանոթանալով այդ գյուղերի կրթական խնդիրներին: Հանդիպելով համայնքերի դպրոցների ուսուցիչների հետ Արմեն Աշոտյանը հայտնեց, որ նախարարությունը Տավուշի որոշ սահմանամերձ գյուղերի կտրամադրի աշակերտական գույք և համակարգչային սարքավորումներ: Որոշակի աջակցություն կցուցաբերվի նաև դասագրքերի ապահովման հարցում: 

«Տավուշի մարզն առաջատար է ներառական կրթության ներդրման գործընթացում: Այստեղ է իրականացվել մեր նախաձեռնած պիլոտային ծրագիրը, որի համաձայն՝ մարզի բոլոր դպր ոցները դարձան ներառական: Սա դժվար, սակայն ակնհայտորեն հաջողված գործընթաց է: Բացի կրթական կարևորությունից, շատ աստվածահաճո գործ է»,- ասաց ԿԳ նախարարը:

Տավուշի մարզում տարեկան շուրջ 300 երեխա սովորում է ներառական համակարգում: «Երկու կարևոր հարց լուծվեց երկու գյուղերի համար: Ինչպես տեսաք` Դովեղում և Բերդավանում նախակրթական կրթության կազմակերպման խնդիրներ կան: Մենք իրականացնում ենք նախակրթարանների բացման ծրագիրը, որը բարձր է գնահատվել հասարակության և միջազգային հանրության կողմից: Այս տարվա ընթացքում երկու գյուղերում էլ կնախաձեռնենք այս ծրագրի իրականցումը»,- ամփոփելով այցը` լրագրողների հետ զրույցում ընդգծեց Աշոտյանը:

Սահմանը պահող գյուղերի ուսուցիչներին հիմնականում հուզում էին ուսանողների ուսման վարձերի զեղչերի, դպրոցների վերանորոգման և ուսուցիչների սոցապահովագրության հարցերը: Բերդավան գյուղի միջնակարգ դպրոցի տնօրեն Արևիկ Ասատրյանը նախարարին հայտնեց, որ մի շարք ծնողներ դժգոհությունների ունեն շախմատի դասագրքերում ընդգրկված բարդ խնդիրներից: Իսկ ուսուցիչներից մեկը բարձրաձայնեց քիմիայի համար հատկացված դասաժամերի սակավության մասին:

2014 թվականին կառավարության նախաձեռնությամբ զեղչվել էր սահմանապահ որոշ գյուղերի ուսանողների ուսման վարձը: Այն իրականացրել էր Հայաստանի երիտասարդական հիմնադրամը: «Այս տարի համապատասխան ֆինանսական միջոցների առկայության պայմաններում հնարավոր է որոշակի օգնություն ցուցաբերվի նաև այլ գյուղերի»,- ուսուցիչների մտահոգությանն ի պատասխան նշեց ԿԳ նախարարը:

ՀՀ պետական սահմանից 1.5 կմ հեռավորության վրա գտնվող Դովեղ գյուղի միջնակարգ դպրոցում 2015-2016 ուսումնական տարում կսովորի 65 աշակերտ: Անցած տարի աշակերտների թիվը եղել է 74: Դպրոցն ունի 20 ուսուցիչ: 

«Բարձր դասարանցիները քանակով ավելի շատ են, քանի որ ծնելիությունը գյուղում գնալով նվազում է»,- «Արմենպրես»-ի հետ զրույցում բացատրեց դպրոցի տնօրեն Սանասար Վարդանյանը: Չնայած մեծ դժվարություններին՝ դովեղցիները հավաստիացնում են, որ իրենք սիրում են իրենց հողը և չեն թողնի այն, միայն թե աշխատանք լինի:

Իսկ սահմանից 2.5 կմ հեռավորության վրա գտնվող Բերդավան գյուղն աչքի է ընկնում իր գերազանց սովորող աշակերտներով: Ակնկալվում է, որ գյուղի միջնակարգ դպրոցում 2015-2016 թվականներին կսովորի մոտ 380 աշակերտ: Ամեն տարի աշակերտերի առնվազն 60 տոկոսն ընդունվում է բարձրագույն ուսումնական հաստատություններ: Իսկ 2015 թվականի 39 շրջանավարտներից 23-ն ընդունվել է պետական առկա ուսուցմամբ բուհ: Ավագ դասարանների աշակերտների թիվը գերազանցում է 100-ը:  Բերդավանի միջնակարգ դպրոցն ունի 47 մանկավարժ, որոնցից ութը վերապատրաստող դասատուներ են:

2014 թվականին դպրոցի աշակերտներից ութերերորդ դասարանցի Ղազարյան Վիկտորյան մանսակցել է «Ամենախելացին» հեռուստախաղին և հասել մինչև եզրափակիչ փուլ: Ինչպես նաև՝ դպրոցից երկու թիմ մասնակցել է Նոյեմբերյանի տարածաշրջանում կազմակերպվող «Ի՞նչ, որտե՞ղ և ե՞րբ» ինտելեկտուալ խաղին՝ գրավելով առաջին և երրորդ տեղերը: