Դանիայի իշխող կուսակցությունը պահանջել է դադարեցնել Թուրքիայի ԵՄ անդամակցության բանակցությունները

Դանիայի իշխող Լիբերալ կուսակցության արտաքին քաղաքականության խոսնակ Միշել Աաստրուպ Յենսենը հայտարարել է, որ անհրաժեշտ է վերջ դնել Թուրքիայի` Եվրամիությանն անդամակցության բանակցություններին:

Վկայակոչելով թուրքական «Ենիչաղ» թերթը, մեկնաբանելով Թուրքիայի հետ ԵՄ միջեւ միգրացիոն համաձայնագրի կյանքի կոչման եւ վիզայի ազատականացման շուրջ Անկարայի եւ Բրյուսելի միջեւ տարաձայնություններն ու Թուրքիայում ռազմական հեղաշրջման փորձից հետո ստեղծված իրավիճակը, Յենսենը լրագրողներին ասել է, որ նախագահ Ռեջեփ Թայիփ Էրդողանի «ոչ ժողովրդավարական նախաձեռնությունների» եւ մահապատիժը վերականգնելու կոչերին նրա աջակցութ յան պատճառով անհրաժեշտ է վերջ դնել Թուրքիայի` ԵՄ բանակցություններին:

«ԵՄ-ին թեկնածու երկրի համար անհրաժեշտ նվազագույն կարմիր գիծն արդեն հատված է», -ասել է նա:

Ենսենը պնդել է, որ Թուրքիան պետք է հանվի ԵՄ-ին թեկնածու երկրների ցուցակից:

«Սա բանակցություններում ոչ թե դադար, այլ իրապես վերջ է, եւ պետք է Թուրքիան թեկնածու երկրների ցուցակից հանվելու պատճառ հանդիսանա», -համոզմունք է հայտնել է նա:

Ավելի վաղ Թուրքիայի ԵՄ անդամակցության դեմ հայտարարությամբ հանդես էր եկել Ավստրիայի արտաքին գործերի նախարար Սեբաստիան Կուրցը: Ինչպես Սեբաստիան Կուրցը, այնպես էլ Ավստրիայի վարչապետ Քրիստիան Քերնը հայտարարել էին ԵՄ-ին անդամակցելու հարցով Թուրքիայի հետ բանակցությունները դադարեցնելու անհրաժեշտության մասին:

Քրիստիան Քերնը հեռուստատեսություններից մեկին տված հարցազրույցում նշել էր, որ Թուրքիայի տնտեսությունը հետ է մնում եվրոպական երկրների տնտեսություններից: Նա ընդգծել էր, որ իրենք չպետք է վախենան պաշտոնական Անկարայի զայրույթից:

«Մենք Թուրքիայի առջեւ խնդրողական վիճակում չենք: Մենք այդ երկր մեծ ներդրողներից ենք: Թուրքիան տնտեսապես կախված է ԵՄ-ից», -ասել էր նա` նշելով, որ միգրացիոն համաձայնագրի հետ կապված Անկարայի սպառնալիքները չեն կարող վախեցնել իրենց:

Գերմանիայի Դաշնության վարչապետ Անգելա Մերկելի օգնական Սիգմար Գաբրիելը օրերս հայտարարել է, որ առաջիկա 20 տարիներին խոսք չի կարող լինել Թուրքիայի` Եվրամիությանն անդամակցության մասին:

Նա ասել է, որ Թուրքիան դեռեւս շատ հեռու է ԵՄ չափանիշներից:

Մերկելի օգնականն ասել է, որ եթե Թուրքիան վերականգնի մահապատիժը, ինչի մասին խոսում է այդ երկրի նախագահ Թայիփ Էրդողանը, ապա ԵՄ բոլոր պայմանները կատարելու դեպքում անգամ անդամակցության բանակցությունները «տարբեր իրավիճակում» կհայտնվեն, այսինքն` կկասեցվեն:

«Մահապատժի վերականգնումը կհակասի ԵՄ հիմնարար իրավունքների հռչակագրին: Այդ ժամանակ անդամակցության բանակցությունների իմաստը կկորի», -նշել է նա: 

Գերմանիայի Ազատ դեմոկրատական կուսակցության  առաջնորդ Քրիստիան Լինդները Թուրքիայի նախագահ Ռեջեփ Թայիփ Էրդողանի գործողությունները` երկրում հունիսի 15-ին տեղի ունեցած ռազմական հեղաշրջման փորձից հետո համեմատել է Գերմանիայի ֆեդերատիվ հանրապետությունում 1930-ական թվականներին նացիստների գործողությունների հետ (Reuters):

Լինդները հիշեցրել է, որ 1930-ական թվականներին քաղաքացիական ազատությունները սահմանափակելու ուղիով նացիստներն ամրապնդել են երկրում իշխանությունը, եւ ներկայում Էրդողանը «անմիջապես իր համար ավտորիտար ռեժիմ է կառուցում»:

Հունիսի 15-ին Թուրքիայում ռազմական հեղաշրջման ձախողված փորձից հետո, որի կազմակերպման մեջ Էրդողանը մեղադրել է իր երբեմնի բարեկամ եւ հովանավոր, չափավոր իսլամի քարոզիչ Ֆեթուլլահ Գյուլենին եւ նրա շարժմանը, Թուրքիայի նախագահը համատարած զտումներ է սկսել երկրի պետական, իրավական, անվտանգության, բիզնես կառույցներում` գյուլենականների հետ կապեր ունենալու կասկածանքով ազատելով աշխատանքից  60 հազարից ավելի մարդու եւ ձերբակալել 13 հազարից ավելի քաղաքացիների: