Խորհուրդներ չափից շատ արևայրուք ստացածներին

Երբեմն մենք այնքան ենք ցանկանում գեղեցիկ արևայրուք ունենալ, որ չափն անցնում ենք և այրում մեր մաշկը:

Ահա մի քանի խորհուրդներ, որոնք կօգնեն ձեզ շուտ ազատվել արևայրուքի ցավոտ հետևանքներից:

1. Սառը ցնցուղ ընդունեք
   Ջուրը մաքրում է փոշին, փափկեցնում և հանգստացնում է մաշկը: Ջրի ջերմաստիճանը չպետք է շատ ցած լինի, քանի որ այն կարող է հոդացավ առաջացնել: Եթե ցնցուղ ընդունելու հնարավորություն չկա, ապա թրջեք սավանը կամ մի փոքր կտոր և դրեք այրված հատվածներին:

   

2. Հորիզոնական դիրք ընդունեք
   Օրգանիզմին հանգիստ է պետք, որպեսզի այն վերականգնվի: Հետևաբար, արևից այրվածքներ ստանալուց հետո ցանկալի է պառկել: Եթե ոտքերը շատ են այրվել, ապա բարձրացրեք ոտքերը և հենեք պատին: Դա կօգնի կանխել այտուցվածությունը:

   

3. Տալկ օգտագործեք
   Եթե այրվածքների պատճառով չեք կարողանում պառկել, ուրեմն սավանի վրա տալկ լցրեք:Այդպես ձեր մաշկը շատ չի դիպչի կտորին և ձեզ ավելի հարմարավետ կզգաք:

   

4. Շատ հեղուկ օգտագործեք
   Այսպես դուք կկանխեք ջրազրկումը, ինչը արևայրուքի ժամանակ անխուսափելի է: Ցանկալի է, որ հեղուկը գազավորված չլինի: Կարող եք խմել սառը թեյ կամ թուրմեր(դաղձ, երիցուկ):

   

5. Տարբեր խառնուրդներ պատրաստեք
   Կարող եք բանջարեղեններից և մրգերից խառնուրդներ պատրաստել: Դրանք կմեղմացնեն ցավը և կարմրածությունը: Եթե խառնուրդը շատ ջրիկ է ստացվում, կարող եք դրանով թրջել կտորը և դնել այրված հատվածներին: Խառնուրդները պատրաստելու համար կարող եք օգտագործել

• Հում կարտոֆիլ

• Լոլիկ և վարունգ

• Գազար և դդում

• Խնձոր և ծիրան

• Ձմերուկ և ելակ

 

Չի՛ կարելի

1. Սառույց դնել
   Սա ժամանակվորապես ձեզ կհանգստացնի, սակայն հետագայում կարող է մեծ խնդիրներ առաջ բերել՝ էպիթելի վնասման պատճառով:

   

2. Օղի քսել
   Արևայրուքի դեպքում չի կարելի սպիրտային լուծույթ քսել այրված հատվածներին, քանի որ դրանք չորացնում են մաշկը: Հենց նույն պատճառով չի կարելի քսել նաև քացախ:

   

3. Կարագ կամ ձեթ
   Կարագ և ձեթ նույնպես չի կարելի քսել, քանի որ դրանք փակում են մաշկի ծակոտիները և թույլ չեն տալիս մաշկին շնչել: Չի կարելի նաև վազելին և ցանկացած յուղ:

   

4. Թթվասեր
   Թթվասեր նույնպես չի կարելի քսել այրված մաշկին, քանի որ կաթնային նյութերը նպաստավոր միջավայր են ստեղծում միկրոբների համար, ինչն էլ կարող է ինֆեկցիա առաջացնել:

   

5. Սուրճ կամ ալկոհոլ օգտագործել:
   Սրանք նպաստում են ջրազրկմանը, ինչը արևայրուքի դեպքում ձեզ ամենևին պետք չէ:

   

   Նյութը հրապարակման պատրաստեց Past.am-ը։