Գյուլենը «երդվում» է վերադառնալ Թուրքիա, եթե ապացուցվի հեղաշրջման փորձում իր մեղքը

 ԱՄՆ-ի Փենսիլվանի նահանգում վտարանդիության մեջ բնակվող թուրք իսլամիստ քարոզիչ Ֆեթուլլահ Գյուլենը, որին թուրքական իշխանությունները մեղադրում են հուլիսի 15-ին Թուրքիայում ռազմական հեղաշրջում կազմակերպելու մեջ, հայտարարել է, որ եթե այդ մեղադրանքների գոնե տասներորդ մասը ապացուցվի, ապա ինքը կամավոր կվերադառնա Թուրքիա:

Այս մասին, ինչպես հաղորդում է«Արմենպրես»-ը, հայտնում է BBC-ին:

«Եթե իմ դեմ մեղադրանքների գոնե տասներորդ մասը ապացուցվի, ես երդվում եմ վերադառնալ Թուրքիա եւ կրել ամենածանր պատիժը»,- գրել է Գյուլենը ֆրանսաիական Le Monde թերթի սյունակում:

Հոդվածում ռազմական փորձից հետո թուրքական իշխանությունների սկսած գործողությունները երկրում բնորոշել է «ուրվականների որս»: 

Նա պահանջել է ստեղծել Թուրքիայում հուլիսի 15-ին տեղի ունեցած ռազմական հեղաշրջման փորձի մանրամասները հետաքննող միջազգային հանձնաժողով:

Նա մտահոգիչ է համարել այն փաստը, որ ռազմական հեղաշրջման փորձից 20 րոպե հետո Թուրքիայի նախագահ Ռեջեփ Թայիփ Էրդողանը, լիովին չտիրապետելով իրավիճակի վերաբերյալ տեղեկատվությանը, տեղի ունեցածի մեջ միանշանակ մեղադրել է իրեն: 

Թուրքիայի իշխանությունները ԱՄՆ-ից պահանջում են արտահանձնել Գյուլենին: Էրդողանը տեղի ունեցածի մեջ մեղադրում է Գյուլենին եւ նրա հետեւորդներին: ԱՄՆ-ը Անկարայից ծանրակշիռ ապացույցներ է պահանջում Գյուլենի` հեղաշրջմանը մասնակից լինելու մասին: 

Գյուլենն իր հերթին հայտարարել է, որ Թուրքիայում անկախ դատական համակարգ գոյություն չունի:

«Լավ հայտնի է, որ թուրքական դատական համակարգն իրավաբանական անկախություն չունի, այնպես որ ինձ ձերբակալելու հրահանգը դեպի բռնապետություն Էրդողանի շարժման եւ ժողովրդավարության սկզբունքներից նրա հեռանալու եւս մեկ օրինակ է»,- հայտարարության մեջ նշել է Գյուլենը:

«Հիզմեթն այսօր» հրատարակությանը տված հարցազրույցում Գյուլենը հայտարարել է, որ Թուրքիայի նախագահ Էրդողանը տառապում է հոգեկան խանգարումով: 

«Էրդողանի խելագարության մասին շատերն են խոսում: Նրա կողքին մշտապես մի քանի բժիշկներ են գտնվում, նա դեղեր է խմում, քանի որ որոշակի խնդիրներ ունի: Նրա շրջապատից մարդիկ ասում են, որ իր նախագահական պալատում նա հոգեկան խանգարման նոպաներ է ունենում», - պատմել է Գյուլենը:

Նա հայտնել է, որ Էրդողանը «թունավորվել է իշխանությամբ» եւ, օրինակ, կատաղության նոպաների ժամանակ ոտքով հարվածում է պատերին: 

Վտարանդի քարոզիչը նաեւ հայտարարել է, որ պատասխանատվություն չի կրում Թուրքիայում ռազմական հեղաշրջման փորձի համար: Նրա խոսքով` ինքը մշտապես հանդես է գալիս բարեփոխումների նկատմամբ ժողովրդավարական մոտեցումների օգտին, իսկ զինված ապստամբությունը միայն վնաս է բերում: 

Պաշտոնական Անկարան Գյուլենին մեղադրում է հուլիսի 15-ին տեղի ունեցած ռազմական հեղաշրջման փորձ կազմակերպելու մեջ: Այն ժամանակ մի խումբ խռովարարներ Թուրքիայում ռազմական հեղաշրջման փորձ են ձեռնարկել: Խռովարարներն իրենց հսկողության տակ են առել մի շարք ռազմավարական օբյեկտներ Անկարայում եւ Ստամբուլում, բայց մի քանի ժամ հետո խռովությունը ճնշվել է:

Վերջին տվյալների համաձայն` դիմակայության արդյունքում, որի կենտրոնը դարձել էին Ստամբուլը եւ Անկարան, զոհվել են 246 քաղաքացիներ, իֆչպես նաև 100-ից ավելի խռովարարներ, 2 հազարից ավելի մարդ էլ վիրավորվել է:  

  «Հիզմեթ Հարեքեթի» ազդեցիկ կրոնական կազմակերպության առաջնորդ  Ֆեթուլլահ Գյուլենի շարժումը, որը համարվում է նաեւ նուրսիստների (նուրչուլար) շարժում, արդի իսլամ քարոզող հզոր շարժում է: Գյուլենական շարժումը քարոզում է իսլամական չափավորություն, հանդուրժողականություն, միջկրոնական երկխոսություն, իսլամի եւ ժողովրդավարության համատեղելիություն:

Այժմ Էրդողանը փորձում է հասնել ԱՄՆ-ից Գյուլենի արտահանձնմանը: Գյուլենն, իր հերթին, դարձել է Էրդողանի առավել նշանակալի քննադատներից մեկը:

Ամերիկյան կողմն այսօր հայտարարել է, որ որոշել են 4 բարձրաստիճան անձանցից կազմված պատվիրակություն ուղարկել Թուրքիա տեղի ունեցած ռազմական հեղաշրջմանը Գյուլենի մասնակցությունը հետաքննելու նպատակով: