Թուրքիան անվտանգության տեսակետից խիստ թուլացել է. համաշխարհային մամուլ

Թուրքիայի Այնթապ քաղաքում շաբաթ օրը տեղի ունեցած ահաբեկչական պայթյունը, որը 53 մարդու կյանք է խլել եւ 67 մարդու տարբեր աստիճանի վնասվածքներ ստանալու պատճառ դարձել, լայն արձագանք է ստացել համաշխարհային մամուլի կողմից:

Ինչպես հաղորդում է «Արմենպրես»-ը, այդ առնչությամբ շվեյցարական Tagesanzeiger թերթը գրել է, որ անվտանգության տեսակետից` Թուրքիան վերին աստիճանի թույլ դրության մեջ է հայտնվել:

«Ակնհայտ է, որ Թուրքիան իրեն պաշտպանելու մեջ անգամ խեղճ վիճակում է, ինչ մնաց կարողանա մասնակցել Սիրիայում ահաբեկիչների դեմ պայքարում: Ռազմական հեղաշրջման փորձից հետո Թուրքիան աշխատանքից հեռացրեց տասնյակ հազարավոր պետական չինովնիկների: Թուրքական կառավարությունը գործում է «թշնամին թափանցել է բոլոր պետական մեխանիզմներ» սկզբունքով: Ոչ մեկը մյուսին չի վստահում: Այժմ բացահայտ նկատվում է, որ ահաբեկչության դեմ պայքարի մասնագետներ Թուրքիան չունի: Այնթապի ահաբեկչության համար ենթադրվում է, որ պատասխանատու է «Իսլամական պետությո ւն» (ԻՊ) ահաբեկչական խմբավորումը: Թուրքիան կարողացավ կանխել հեղաշրջման փորձը, սակայն ներկայում եղածի չափ երբեք թույլ չէր եղել», -գրել է թերթը:

Neue Osnabruker Zeitung թերթը գրել է. «Նախագահ Թայիփ Էրդողանը թուրք ժողովրդին կոչ է արել միասնաբար պայքարել երկրի թշնամիների դեմ` միեւնույն նժարին դնելով Քրդստանի աշխատավորական կուսակցությանը (PKK), «Ֆեթուլլահ Գյուլենի ահաբեկչական կազմակերպությանը» (այսպես է Էրդողանն անվանում գյուլենականներին)  եւ ԻՊ-ին: Այդպիսով նա կանաչ ճանապարհ է բացում իր իշխանության ընդդիմադիրներին ամբողջությամբ վերացնելու համար»:

Badische Zeitung թերթը գրում է, որ նախագահ Էրդողանն ազնիվ չէ` ահաբեկչության դեմ պայքարի համար անհրաժեշտ քաղաքական համաձայնության որոնման մեջ:

«Էրդողանի Թուրքիան մասնատված է: Այդ վիճակը դյուրացնում է հեղաշրջման ձեռնարկումները ճնշելու պատրվակով Թուրքիայի հարձակումները քրդերի եւ իսլամիստների վրա: Ահաբեկչական հարձակումները կանխելը վերին աստիճանի դժվար է: Սակայն անվտանգության եւ արդարադատության կառուցվածքում պետության կողմից իրագործվող զանգվածային մաքրումներն ավելի են դժվարացնում ահաբեկչության կանխումը», -ընդգծում է թերթը:

Frankfurter Allgemeine Zeitung թերթն էլ թեմայի հետ կապված քննարկումները մեկնաբանել է հետեւյալ կերպ.

«Թուրքիայի քաղաքական գործիչները պետք է լավ գիտենան, որ փախստականների քաղաքականության մեջ իրավունքի գերակայության չգիտակցումը, սեփական երկրի նկատմամբ հարգանք դրսեւորելու մեջ թերանալը բերելու է սեփական չափանիշների անտեսմանը: Արդեն եկել է այս բոլորը գիտակցելու համար սեփական դիմակը հանելու ժամանակը»: