Երեկ «Շանթ» հեռուստաընկերությունը հեռուստադիտողի դատին հանձնեց նոր՝ բազմասերիանոց «Փոխնակ մայրը» հեռուստասերիալը, որի ռեժիսորները Արտյոմ Հարությունյանը և Հայկ Վարդանյանն են: Սերիալի հիմքում ընկած է սուրոգատ մոր թեման, բացի դա, ներկայացվում է երկու ընկերների մութ անցյալի պատմություն: Սցենարի հեղինակը Ռոման Մուշեղյանն է, իսկ համահեղինակը Էդուարդ Զորիկյանը:Life.panorama.am-ը զրուցել է սերիալի գլխավոր դերակատարներից մեկի՝ Տիգրան Ներսիսյանի հետ՝ նկարահանվելու առաջարկն ընդունելու, մարմնավորած կերպարի և այլ մանրամասների մասին:
«Հեռուստասերիալում նկարահանվելու առաջարկը միանգամից ընդունեցի, քանի որ ներկայացված բոլոր հանգամանքները և պայմանները դրական էին»,- ասաց Տիգրան Ներսիսյանը՝ մանրամասնելով, թե, այնուամենայնիվ, առաջարկն ընդունելուց ինչին է առաջին հերթին ուշադրություն դարձրել.
«Բոլորը գիտեն, որ կան մի քանի կետեր, որոնց որ ես ուշադրություն եմ դարձնում: Այդ կետերից ինձ համար ամենաառաջնայինը սցենարն է: Երբ հեռուստասերիալի գեղարվեստական ղեկավար Ռոման Մուշեղյանը ծանոթացրեց ինձ հեռուստասերիալի սցենարին, այն ինձ միանգամից գրավեց և ես հաճույքով համաձայնեցի: Սերիալում նկարահանվելու կարևոր կետերից մեկը նաև այն կերպարն էր, որին ես պետք է մարմնավորեի»,- հստակեցրեց Տիգրան Ներսիսյանը:
Անդրադառնալով իր կերպարին՝ դերասանը նշեց, որ հեռուստասերիալի ձևաչափում առաջին անգամ հանդես է գալիս բացասական կերպարով.
«Նշեմ, որ դեռ նման դերով չէի ներկայացել: Այս անգամ իմ կերպարն ավելի բացասական երանգներով է: Ընդհանրապես, իմ մարմնավորած կերպարը սկզբից մինչև վերջ իր ընթացքով հուզող է և տրամադրող: Նա մարդ է, ով հասել է իր կյանքում ամեն ինչի, բայց դա արել է` խախտելով բոլոր տեսակի մարդկային և կյանքի օրենքները: Նա դա արել է անցնելով ամեն ինչի վրայով և դեռ պատրաստ է անցնել` հասնելու համար իր առջև դրված նպատակին. ամեն գնով, ամեն քայլով հասնել իր նպատակին, սա է հենց իմ կերպարի նկարագրություններից մեկը: Նրա դեպքում կարծես թե աստվածայինը, խղճի հանգամանքը, բարությունը պարզապես բացակայում են: Նույնիսկ իր ապրած տարիների ընթացքում արած բացասական երևույթների համար նա խղճի խայթ չի զգում, չի մեղանչում և շարունակում է նույն կերպ առաջ շարժվել: Կարծում եմ, որ այսօր մարդկային նման օրինակներ շատ կան»,- նշեց Տիգրան Ներսիսյանը:
Չցանկանալով բացել ավել փակագծեր՝ դերասանը պատմեց, որ ըստ սցենարի՝ իր կերպարի համար շատ կարևոր հանդիպում է տեղի է ունենում քրեակատարողական հիմնարկում, որտեղ նա գնում է գործնական հանդիպման իր գործընկերոջ մոտ, ում հետ, սակայն, հետագայում լուրջ խնդիրներ է ունենում:
«Բացի գործնական այդ հանդիպումից, կերպարս ունենում է նաև մեկ այլ՝ շատ տհաճ հանդիպում՝ կապված իր անցյալի հետ»,- ավելացրեց պրն. Ներսիսյանը:
«Փոխնակ մայրը» հեռուստասերիալի հիմքում մարդկային պատմությունն է: Այստեղ արծարծվում է փոխնակ մոր թեման, որը որ, ինչպես նշում է դերասանը, ներկայումս շատ արդիական է.
«Թեմա, որն այսօր մտել է մեր հասարակության, մեր կենցաղի մեջ: Պետք է անկեղծ լինեմ և նշեմ, որ հենց այս թեման էլ ինձ հուզեց, ինչպես նաև սցենարում իմ ուշադրությունը գրավեց երկու ընկերների մութ պատմությունը»,- շարունակեց Տիգրան Ներսիսյանը:
Ըստ նրա խոսքերի՝ տվյալ հեռուստասերիալը մարդու, մարդկայինի, կյանքի մասին է, թե ինչպիսին պետք է լինի մարդն իր վայրիվերումներով, իր բացասական և դրական կողմերով:
Անդրադառնալով իր խաղընկերներին՝ Տիգրան Ներսիսյանը ուրախությամբ նշեց, որ նրանցից բոլորն էլ պրոֆեսիոնալ և իրենց գործին գիտակ մարդիկ են.
«Պետք է ասեմ, որ ինձ համար շատ կարևոր էր, թե ովքեր են լինելու իմ խաղընկերները, այն դերասանները, որոնց հետ ես պետք է ստեղծագործական այս պրոցեսն անցկացնեի: Ինձ համար շատ ուրախալի էր, որ նրանցից բոլորը պրոֆեսիոնալ մարդիկ էին, ովքեր արդեն երկար տարիներ իմ ընկերներն են: Նրանցից են, օրինակ, Հովակ Գալոյանը, Ելենա Բորիսենկոն, Անահիտ Քոչարյանը և այլն...»:
.jpg)
Իսկ թե առհասարակ որքանո ՞ վ է նա որպես դերասան կարևորում նախագծում հանդես եկող մյուս դերասանների մասնագիտական կրթությունը, Տիգրան Ներսիսյանը պատասխանեց.
«Իհարկե, ինձ համար այդ փաստը չափազանց կարևոր է, որովհետև դա մասնագիտության հարց է: Դերասանը պետք է պրոֆեսիոնալ լինի և բացի դա,երբ դու գիտես, որ դիմացինդ տաղանդավոր մարդ է, իր գործին տեղյակ մարդ է, դա ավելի է ոգևորում: Ուրախալի է նաև այն հանգամանքը, որ «Փոխնակ մայրը» սերիալում երիտասարդների աստղաբույլ կա, ինչը պակաս կարևոր չէ»:
Այն հարցին, թե ըստ իրեն՝ ո՞րն է տվյալ հեռուստասերիալի հաջողության գրավականը, Տիգրան Ներսիսյանը կրկին առաջ բերեց որակը.
«Ընդհանարապես, ոչ միայն սերիալի ձևաչափին, այլև նաև կինոյին, թատրոնին, առհասարակ, յուրաքանչյուր գործին պետք է մոտենալ ամենայն խստությամբ և լրջությամբ: Գիտեք, իմ խորին համոզմամբ, պետք չէ գնալ, այսպես ասած, ռեյտինգի հետևից: Դա պարտադիր պայման չէ, որովհետև հնարավոր է, որ այս կամ այն նախագիծը ունենա բարձր ռեյտինգ, բայց որակով զիջի: Հաջողության գրավականն առաջին հերթին պետք է լինի այն, որ ինչ եռանդով, տենչանքով, ուժով և աշխատասիրությամբ սկսել ես, այնպես էլ շարունակես և ավարտին հասցնես, որովհետև սերիալային գործունեությունը տևական աշխատանք է: Բնականաբար, նաև պետք է լինի որակ, գործին պրոֆեսիոնալ մոտեցում: Սա թիմային աշխատանք է, բոլորը` ռեժիսորը, սցենարիստը, դերասանները, պետք է իրենց օղակներում աշխատեն, չթերանան»,- հավելեց դերասանը:
.jpg)
Խոսելով սերիալի ընթացքի մասին` Տիգրան Ներսիսյանը նշեց, որ որքանով ինքն է տեղյակ, այն երկարաժամկետ է, բայց դժվարացավ պատասխանել, թե կոնկրետ որքան ժամանակ այն կմնա հեռուստաէկրաններին.
«Սցենարի մի մեծ չափաբաժին արդեն պատրաստ է: Այս դեպքում ոգևորող է նաև այն հանգամանքը, որ դերասանները հնարավորություն ունեն ծանոթանալու իրենց դերերին, հնարավորություն ունեն տեղեկանալու, թե հետագայում ինչ զարգացում է ունենալու իրենց կերպարը: Դա ևս շատ կարևոր նախապայման է»,- Life.panorama.am-ի հետ իր խոսքը եզրափակեց դերասան Տիգրան Ներսիսյանը:
