Life.panorama.am-ը գրում է.
Դերասանուհի Լուիզա Ղամբարյանը Հայաստանի հանրային հեռուստաընկերության հոբելյանական 60-րդ եթերաշրջանում որպես հաղորդավարուհի կներկայանա: Իրեն հատուկ խաղաղ ժպիտով Լուիզա Ղամբարյանը հասարակական եւ մշակութային գործիչներին կբացահայտի «Կյանքն ափի մեջ» հաղորդման շրջանակում:
Մինչ Life.panorama.am-ի հետ զրույցում դերասանուհին կխոսեր հաղորդման բնույթի մասին, նախ նշեց.
«Սա ինձ համար սպասված առաջարկ էր. իսկապես շատ ուրախալի փաստ էր, երբ Հայաստանի հանրային հեռուստաընկերության կողմց առաջարկ ստացա ու հնարավորություն ունեցա ներկայանալու այս անկեղծ հաղորդման շրջանակում: Առհասարակ, հեռուստատեսությունն ինձ համար հետաքրքիր ոլորտ է, ուր կարելի է անկեղծորեն ստեղծագործել, ու ես հաճույք եմ ստանում այս աշխատանքից: Ի դեպ՝ այս հաղորդումն ինձ հնարավորություն տվեց նոր որակի ու տեսակի մեջ հանդես գալ իմ հանդիսատեսին»:
Անդրադառնալով «Կյանքն ափի մեջ» հաղորդման բնույթին՝ Լուիզան պատմեց.
«Հաղորդումն իր ձեւաչափով հյուրասրահ է, որտեղ հուրընկալվում են տարբեր ոլորտների, հետաքրքրությունների ու նախասիրությունների մարդիկ, ովքեր կարող են լինել եւ ճանաչված, եւ ոչ այնքան հայտնի: Իսկ ես կփորձեմ իմ հյուրերի հետ անկեղծ զրույցի շրջանակում որոշ բացահայտումներ անել նրանց կյանքի չբացահայտված էջերից, ինչը հատկապես մեր օրերում շատ կարեւոր է, քանի հիմա հաճախ են բամբասանքների ու չարախոսությունների թեմա դառնում հայտնիների անձնական կյանքը: Իհարկե, մենք հեծանիվ չենք բացահայտելու, ոչ էլ աննախադեպ, սենսացիոն լուրեր ենք հայտնելու, ոչ՝ դա մեզ համար ինքնանպատակ չէ, փոխարենը մեր թիմը ձգտում է անկեղծ զրույց ստանալ, որը եթերային ցուցադրության ժամանակ նույնքան անկեղծ թվա, որքան էկրաններից այն կողմ»:
.jpg)
Թեեւ հաղորդումը կվարի Լուիզա Ղամբարյանը, սակայն նրա խոսքով՝ «Կյանքն ափի մեջ» հաղորդաշարի վրա մեծ թիմ է աշխատում, որոնցից ամեն մեկն անում է ամեն բան՝ հաջողված ծրագիր ստանալու համար:
Հետաքրքրվելով, թե Լուիզա Ղամբարյանը նոր ոլորտում դժվարությունների հանդիպե՞լ է արդյոք, դերասանուհին պատասխանեց.
«Ես ոչ միայն որպես հաղորդավարուհի եմ ներկայանում, այլ ավելի շատ զրուցակից: Ինչպես նշեցի, նպատակն էլ հենց անկեղծ զրույց ստանալն է: Մենք հեռուստադիտողին ցույց ենք տալու, որ հայտնի մարդիկ բացի հայտնի լինելուց սովորական մարդիկ են՝ իրենց հոգսերով, ուժեղ ու թույլ կողմերով, թերություններով ու առավելություններով: Այս ամենն իրականացնելու համար անհրաժեշտ է ոչ թե հաղորդավարուհու ձիրք ունենալ, այլ պարզապես զրուցել, ինչն էլ ես փորձում եմ անել: Իհարկե, սա նաեւ դժվար է ինձ համար, բայց շատ ավելի հետաքրքիր: Ի դեպ՝ նշեմ, որ մի քանի նկարահանումներից հետո հասկացա, որ հյուրերիցս շատ բան եմ սովորում, ինչն ինձ համար առավել հետաքրքիր է»:
