Յոթ տարօրինակ բաներ, որոնք կարող են տեղի ունենալ քնի մեջ

ЛАЙФ 8 Сентябрь, 2016 0:02

Սովորաբար, երբ դուք քնած եք, ձեր մարմինը կաթվածահար է: Երբեմն քնի մեջ մարդու հետ տեղի են ունենում զարմանահրաշ բաներ, որոնք կարող են նրան ամբողջությամբ շփոթմունքի մեջ գցել: Սակայն այդպիսի դեպքերում պետք չէ անհանգստանալ: Քնի փորձագետներն ապակոդավորում են այդ երեւույթները, հաղորդում է Fox News-ը:

Ընկնելու զգացողություն

Դա տեղի է ունենում, երբ դուք նոր եք սկսում քնել: Սովորաբար, երբ դուք քնած եք, ձեր մարմինը կաթվածահար է, բայց երբեմն դուք քուն եք մտնում նախքան ձեր մարմնի «անջատվելը»: Եվ այդ ժամանակ ձեզ պատում է զգացողություն, ասես դուք ներքեւ եք ընկնում ժայռից կամ երկնքից, ասում է Վիրջինիայի Martha Jefferson հիվանդանոցի քնի կենտրոնի բժշկական տնօրեն բժիշկ Քրիսթոֆեր Ուինթերը:

Քնի կաթված

Առավոտյան արթնանալիս դուք գիտակցում եք, որ չեք կարող ոչ շարժվել, ոչ որեւէ բան ասել: Դա կարող է տեւել մի քանի վայրկյանից մինչեւ մի քանի րոպե, եւ դա սարսափելի է: «Երբեմն մարդն զգում է, որ չի կարող շնչել: Բազմաթիվ մարդիկ նկարագրում են այս վիճակն այնպես, որ կարծես նրանց կրծքին փիղ էր նստել: Դա տեղի է ունենում այն պատճառով, որ շնչառությունը վերահսկող բոլոր մկանները դեռեւս կաթվածահար են», - ասում է Ուինթերը:

Լուսնոտություն

Քնի հետ կապված երեւույթների մեծամասնությունն անվնաս են: Սակայն լուսնոտությունը կարող է շատ վտանգավոր խնդիր դառնալ, քանի որ մարդը կարող է սայթաքել, բախվել ինչ-որ առարկայի, տանից դուրս գալ եւ նույնիսկ մեքենայի տակ ընկնել: «Լուսնոտության ժամանակ դուք դուրս եք գալիս քնած վիճակից հենց այնքանով, որքանով որ անհրաժեշտ է մարմինը շարժելու, սակայն դա անբավարար է ուղեղի գործունեության համար», - ասում է Ուինթերը: Հենց այդ պատճառով է, որ լուսնոտները սովորաբար չեն հիշում իրենց գիշերային զբոսանքները:

Խոսակցություններ քնի մեջ

Համաձայն քնի բժշկության ամերիկյան ակադեմիայի՝ մեծահասակների մոտ 5%-ը խոսում են քնի մեջ: Այդ խոսակցությունների մեծամասնությունն ընդհանուր առմամբ տեւում է 30 վայրկյան: «Քնի առաջին ժամերի ընթացքում, երբ մարմինը մտնում է խոր քնի փուլի մեջ, մկանները դեռեւս պահպանում են իրենց տոնուսը եւ ի վիճակի են ձայներ արջակել կամ շարժումներ կատարել», - ասում է Ուինթերը:

Կրկնվող երազներ

«Քունը մեր ուղեղին հնարավորություն է տալիս ընկալել այն բաները, որոնք անհրաժեշտ է վերանայել եւ վերագնահատել՝ մինչ ուղեղը դրանք կհավաքի «հիշողություններ» կոչվող կույտի մեջ: Երազները կարող են կրկնվել, եթե ձեզ մոտ առկա են չլուծված հոգեբանական խնդիրներ, որոնք ձեր ուղեղը փորձում է ընկալել», - պարզաբանում է Ուինթերը:

Սեքս քնի մեջ

Դուք միակը չեք, ով արթնացել է սեռական ակտի կեսից: Քնի խանգարումների կենտրոնում 800 հիվանդների մոտ կատարված հետազոտության ժամանակ հիվանդների մոտ 8%-ը հայտնել են սեքսոմնիայի դեպքերի ՝ երազում զուգընկերոջ հետ սեռական հարաբերության մասին։

Պայթող գլխի համախտանիշ

Դա նույնքան տարօրինակ վիճակ է, որքան իր անվանումը. «Մարդը հանկարծակի արթնանում է, լսելով պայթյունի նման ուժեղ աղմուկ, տեսնելով վառ լուսարձակում կամ այն զգացողությունից, որ իր գլուխը պայթել է, - ասում է բժիշկ Ուինթերը: -Իրականում ոչ մի այդպիսի բան տեղի չի ունենում: Դուք ուղղակի մտնում եք խորը քնի փուլ, սակայն ձեր մարմինը դեռեւս ամբողջությամբ չի անջատվել»: