Հայաստանն ու Ղազախստանը խորացնում են համագործակցությունը հարկային եւ մաքսային ոլորտում

News.am-ը գրում է.

ՀՀ ԿԱ պետական եկամուտների կոմիտեի նախագահ Հովհաննես Հովսեփյանը սեպտեմբերի 9-ին ընդունել է Ղազախստանի Հանրապետության ֆինանսների նախարարության պետական եկամուտների կոմիտեի նախագահ Դաուլետ Երգոժինի գլխավորած պատվիրակությանը:

ՊԵԿ մամուլի ծառայությունից NEWS.am-ին հայտնում են, որ երկու երկրների ՊԵԿ ղեկավար անձնակազմերի աշխատանքային հանդիպման առանցքը եղել է հարկային եւ մաքսային վարչարարության ոլորտում հայ-ղազախական գործակցությունը:

Դեռեւս 2000թ.-ից Հայաստանի եւ Ղազախստանի միջեւ գործող համաձայնագրի շնորհիվ մեր երկրների հարկային եւ մաքսային մարմինները կարողանում են բարձր արդյունավետությամբ փոխանակել անհրաժեշտ տեղեկատվությունը: Իսկ 2012թ.-ին կնքված համաձայնագիրը թույլ է տալիս բացառել կրկնակի հարկումը:

«Մեր գերատեսչությունները կընդլայնեն հարկային եւ մաքսային տեղեկատվության փոխանակումը՝ անցնելով գործընթացի ավտոմատացմանը՝ միջազգային չափանիշների համաձայն: Դա արտաքին տնտեսական գործունեության մասնակիցներին հնարավորություն կտա տնտեսել աշխատաժամանակը, աշխատուժն ու ֆինանսական ռեսուրսների ծախքերը եւ բարձրացնել ռիսկերի կառավարման արդյունավետությունը»,-նկատել է Հովհաննես Հովսեփյանը: Կողմերը համաձայնել են ձեռնարկել անհրաժեշտ բոլոր միջոցները՝ «Մաքսային ոլորտում ՀՀ եւ Ղազախստանի Հանրապետության համագործակցության ամրապնդման գծով 2016թ. համատեղ գործողությունների ծրագրի» կատարումն ապահովելու համար: Առաջարկվել է հետագայում նույնպես կիրառել երկու կողմերի միջեւ համատեղ գործողությունների ծրագրեր նախաձեռնելու պրակտիկան: «Ղազախստանն այս տարվանից նախատեսել է ներդնել խոշոր հարկատուների աուդիտի էլեկտրոնային համակարգ, ինչը թույլ է տալու կրճատել ստուգումների անցկացման ժամկետները եւ նվազեցնել դրանց իրականացման ծախսերը: Այդ առումով, կարծում եմ, մեր կառույցների միջեւ համագործակցության եւս մեկ հարթակ է ձեւավորվելու»,-նշել է Հ. Հովսեփյանը:

ՀՀ եւ ՂՀ ՊԵԿ պաշտոնակիցներն անդրադարձել են նաեւ հայաստանյան եւ ղազախական այն ռեզիդենտների հետ կապված հարկային տեղեկատվության փոխանակման խնդիրներին, որոնք տնտեսական գործունեություն են իրականացնում եւ եկամուտներ ստանում մյուս երկրի տարածքում: Բացի այդ ուսումնասիրվել են տնտեսվարող սուբյեկտներին մատուցվող էլեկտրոնային ծառայությունների գծով տեղեկատվության փոխանակման հարցերը՝ հաշվետվությունների ներկայացումից ու հաշիվների դուրսգրումից մինչեւ ապրանքների դրոշմապիտակավորում: Կողմերը դիտարկել են տնտեսական կապերի ընդլայնման հեռանկարը: «Հայաստանյան մեր գործընկերների հետ քննարկում ենք դեպի Ղազախստան տրանսպորտային երթուղիների բացման հարցը, քանի որ հայկական ապրանքների համար Ղազախստանի տարածքում առեւտրի մեծ ներուժ կա, որը կարող է նպաստել ոչ միայն հարկային-մաքսային ծառայությունների փոխհարաբերությունների բարելավմանը, այլեւ, առհասարակ, մեր տնտեսությունների զարգացմանը»,-ընդգծել է Դաուլետ Երգոժինը:

Հանդիպման ավարտին Հովհաննես Հովսեփյանը եւ Դաուլետ Երգոժինը քննարկման արդյունքների վերաբերյալ արձանագրություն են ստորագրել: