Հրազդանի արհեստագործական պետական ուսումնարանում բացվել է «Արմաթ» լաբորատորիա

ՀՀ կրթության և գիտության նախարարության ենթակայությամբ գործող թվով 9 միջին մասնագիտական ուսումնական հասատատություններում «Անուշավան Աբրահամյան» կրթական հիմնադրամի աջակցությամբ նոր ուսումնական տարվա մեկնարկին հիմնվել են «Արմաթ» ինժեներական լաբորատորիաներ: Սոցիալական ուղղվածությամբ կրթական ծրագրի շրջանակում հրթական լաբորատորիան բացվել է ՀՀ ԿԳՆ Հրազդանի արհեստագործական պետական ուսումնարանում: Նորաբաց լաբորատորիաներում անվճար հիմունքներով կգործի ռոբոտիկայի խմբակ, որին կարող են հաճախել ոչ միայն համապատասխան ուսումնական հաստատությունների ուսանողները, այլ նաև հարակից բնակավայրերի աշակերտները:

Բացմանը ներկա են եղել ՀՀ ԿԳ նախարարի խորհրդական Արտակ Աղբալյանը, ամերիկահայ բարերար Անուշավան Աբրահամյանը և Ինֆորմացիոն տեխնոլոգիաների ձեռնարկությունների միության (ԻՏՁՄ) տնօրեն Կարեն Վարդանյանը: Այս մասին «Արմենպրես»-ին տեղեկացրին ՀՀ կրթության և գիտության նախարարության հասարակայնության հետ կապերի և տեղեկատվության վարչությունից:

Շնորհավորելով լաբորատորիայի բացման կապակցությամբ` Ա. Աղբալյանը ԿԳՆ անունից շնորհակալություն է հայտնել «Անուշավան Աբրահամյան» կրթական հիմնադրամին համագործակցության համար` շեշտելով, որ սկսած 2006 թվականից՝  բարերարը նախարարության հետ համատեղ ՄԿՈՒ ոլորտում իրականացնում է համատեղ ծրագրեր մարզային ուսումնական հաստատություններում. «Մենք լիահույս ենք, որ այս լաբորատորիան տվյալ տարածաշրջանի աշակերտների համար դառնալու է յուրօրինակ «Թումո» կենտրոն: Սա առաջին քայլն է` ուսումնարանում նոր մասնագիտություն բացելու ուղղությա մբ: Այս լաբորատորիայում մենք ուզում ենք տեսնել նոր մոտոցումներ և նորարարական նախագծեր»,- նշել է նա: 
Բարերար Ա. Աբրահամյանը  շեշտել է, որ ուրախ է մասնակցություն ունենալ հայրենիքի համար կարևոր մասնագիտությունների ներդրմանը. «Մեր աշխատանքի արդյունքը երևալու է Ձեր կրթության արդյունքներից: Մեր հիմնադրամի նպատակն է եղել աջակցել Հայաստանում միջին մասնագիտական կրթության ոլորտի զարգացմանը, և ես ավանդել եմ, որ այն լինի մշտական»,- նշել է Ա. Աբրահամյանը:

Բացմանը ներկա ԻՏՁՄ տնօրեն Կարեն Վարդանյանի ընգծմամբ՝ ԿԳՆ-ի հետ համատեղ իրականացվող ծրագրի նպատակը ինժեներական  կրթության զարգացումն է, որը մեր պետության համար ունի ռազմավարական առաջնահերթություն. «Այս լաբորատորիան աշակերտներին հնարավորություն կտա ծանոթանալ ծրագրավորմանը, հետագայում նաև ռոբոտաշինությանը և եռաչափ մոդելավորմանը:  Ինժեներական մտքի զարգացմնան կարևորությունը մեզ համար առանձնակի ընդգծվեց ապրիլյան պատերազմի ժամանակ, և մենք, այս կարգի լաբորատորիաների բացմամբ, փորձում ենք լրացնել այն բացը, որն ունենք այս ասպարզում»,- իր խոսքում նշել է Կարեն Վարդանյանը:

 Ուսումնարանի տնօրեն Անդրանիկ Սարիբեկյանն իր խոսքում նշել է, որ ինժեներական լաբորատորիայի բացումը նոր էջ է ուսումնարանի տարեգրության մեջ. «Ուսումնարանում գործող մասնագիտություններից երկուսը ինժեներական ուղղավածություն ունեն, և ես կարծում եմ, որ լաբորատորիան նոր որակ կապահովի ուսումնական գործընթացում, ինչպես նաև հիմք կհանդիսանա համակարգչային ուղղվածության մասնագիտություն ներդնելու ու զարգացնելու համար»,- նշել է Ա. Սարիբեկյանը` հավելելով, որ գալիք տարվանից ուսումնարանում կգործի նաև «Համակարգիչների շահագործում» մանագիտությունը: 

«Արմաթ» ինժեներական լաբորատորիայում առկա են հայրենական արտադրության եռաչափ (3D) տպիչներ, մինի համակարգիչներ, ռոբոտաշինության հավաքածուներ և այլ սարքեր: Աշակերտները վերապատրաստված խմբակավարների օգնությամբ կսովորեն ծրագրավորման տարրական հմտություններ, կստեղծեն ռոբոտներ, կմասնակցեն մի շարք խրախուսական մրցույթների: 

«Անուշավան Աբրահամյան» կրթական հիմնադրամի օժանդակությամբ՝ «Արմաթ» ինժեներական լաբորատորիա է գործում նաև Մարալիկի արհեստագործական պետական ուսումնարանում, Արմավիրի պետական ինդուստրիալ-մանկավարժական քոլեջում, Վարդենիսի «Բադեյան» պետական քոլեջում, Տավուշի, Սյունիքի և Վայոց ձորի տարածաշրջանային պետական քոլեջներում, Վանաձորի Ս. Թևոսյանի անվան պետական պոլիտեխնիկական և Արարատի պետական քոլեջներում: 
 ՀՀ հանրակրթական համակարգում «Արմաթ» ինժեներական լաբորատորիաների ներդրման ծրագիրը իրականացվում է Ինֆոր մացիոն տեխնոլոգիաների ձեռնարկությունների միության (ԻՏՁՄ)  աջակցությամբ: