160 մլրդ դրամ՝ ՀՀ պաշտպանությանը, անվտանգությանը և հասարակական կարգի պահպանությանը

Հայաստանի Հանրապետության պետական բյուջեից իրականացվող ծախսերի հիմնական ուղղություններից մեկը ուժային կառույցներին ուղղվող ֆինանսավորումն է: 2016 թվականի առաջին կիսամյակի տվյալներով՝ այս ոլորտներին հատկացվող ֆինանսավորումը ունեցել է հետևյալ կառուցվածքը:

Պաշտպանության բնագավառին ՀՀ պետական բյուջեից տրամադրվել է 88.3 մլրդ դրամ: Նշված միջոցներից 86.1 մլրդ դրամը տրամադրվել է ռազմական պաշտպանությանը, 80.3 մլն դրամը` արտաքին ռազմական օգնությանը, 470.1 մլն դրամը` պաշտպանության ոլորտում հետազոտական և նախագծային աշխատանքներին, 1.7 մլրդ դրամը` այլ դասերին չպատկանող պաշտպանական ծախսերին: Ծրագրից շեղումը հիմնականում պայմանավորված է ռազմական կարիքների բավարարման ծախսերի կատարողականով, որը կազմել է 93.7% կամ 85.8 մլրդ դրամ: Նախորդ տարվա առաջին կիսամյակի համեմատ պաշտպանության ծախսերն աճել են 4.8%-ով` հիմնականում պայմանավորված ռազմական կարիքների բավարարման ծախսերի աճով:

Հասարակական կարգի, անվտանգության և դատական գործունեության բնագավառին 2016 թվականի առաջին կիսամյակում ՀՀ պետական բյուջեից տրամադրվել է 50.9 մլրդ դրամ՝ ապահովելով կիսամյակային ծրագրի 92.6% կատարողական: Նշված բաժնի ծախսերի 71.3%-ն ուղղվել է հասարակական կարգի և անվտանգության պահպանության, 5.2%-ը` փրկարար ծառայության, 8.8% ը` դատական գործունեության և իրավական պաշտպանության, 2.9% ը` դատախազության, 7.2% ը` կալանավայրերի և 4.6% ը` նախաքննության ծախսերի ֆինանսավորմանը: Նախորդ տարվա նույն ժամանակահատվածի համեմատ հասարակական կարգի, անվտանգության և դատական գործունեության բնագավառի ծախսերը նվազել են 1.7%-ով կամ 884.3 մլն դրամով` հիմնականում պայմանավորված կալանավայրերի և ոստիկանության ծախսերի կրճատմամբ:

Ազգային անվտանգությանն այս տարվա առաջին կիսամյակում հատկացվել է 7.6 և պետական պահպանությանը՝ 1.1 մլրդ դրամ: 2015 թվականի առաջին կիսամյակի համեմատ ազգային անվտանգության և պետական պահպանության ծախսերն աճել են համապատասխանաբար 5.1%-ով և 1.3%-ով՝ հիմնականում պայմանավորված նշված համակարգերում աշխատանքի վարձատրության ծախսերի աճով, իսկ ոստիկանության ծախսերը նվազել են 2.2%-ով՝ հիմնականում պայմանավորված ՀՀ կառավարությանն առընթեր ոստիկանության արտաբյուջետային ծրագրերի շրջանակներում կատարված ծախսերի նվազմամբ: Նշենք, որ նախորդ տարիներին պետական պահպանության ծախսերն ընդգրկված են եղել Ազգային անվտանգության ծախսերի դասում:

Փրկարար ծառայության ծախսերը հաշվետու ժամանակահատվածում կազմել են շուրջ 2.7 մլրդ դրամ:

Դատախազության խմբի ծախսերը հաշվետու ժամանակահատվածում կազմել են 1.5 մլրդ դրամ, 3.6 մլրդ դրամ է տրամադրվել կալանավայրերին և ավելի քան 2.3 մլրդ դրամ են կազմել նախաքննության ծախսերը: