Սերժ Սարգսյանի հետ հանդիպած ընդդիմադիրները չեն կարողանա մարսել դա. «Հայազն»-ի ներկայացուցիչ

 Ինչպես հայտնում է Past.am-ը, «Հայազն» կուսակցությունը մերժում է առաջարկվող սահմանադրական փոփոխությունները: Այս մասին այսօր՝ սեպտեմբերի 3-ին, «Անդրադարձ» մամուլի ակումբում հայտարարեցին կուսակցության ներկայացուցիչներ Արմեն Աղայանն ու Արմեն Հովհաննիսյանը:

Ըստ Արմեն Աղայանի՝ իրենք մերժում են թե՛ գործող նախագահի, թե՛ Հանրապետական կուսակցության կողմից սահմանադրական փոփոխություններ առաջարկելու բարոյական իրավունքը՝ հաշվի առնելով վերջին տարիների նրանց գործունեությունը :

«Մերժում ենք սահմանադրական բարեփոխումների արատավոր մեխանիզմը: Մերժելի է այն մոտիվացիան, որի համար էլ կատարվում է Սահմանադրության փոփոխությունը: Սերժ Սարգսյանն ուզում է երկարաձգել իր իշխանությունը: Դա է Սահմանադրությունը փոխելու պատճառը»,- նշեց Արմեն Աղայանը:

Բանախոսը  համոզված է, որ այսօրվա իշխանություններն ունեն ցածր վարկանիշ և նրանց ցանկացած նախաձեռնություն հանրության կողմից ենթակա է մերժման: Այնուհանդերձ, Արմեն Աղայանը գտնում է, որ գործող Սահմանադրությունն էլ լավը չէ և սխալ է գործող սահմանադրության և առաջարկվող փոփոխությունների միջև պարտադրված ընտրությունը:

«Մեզ այլ տիպի Սահմանադրություն է պետք, որը կապահովի մեր ազգային հավաքական մտածողությունը, ազգային որոշումների հավաքական կայացումը»,- հավելեց նա: 

Ասուլիսի մեկ այլ բանախոս՝ Արմեն Հովհաննիսյանը հայտարարեց, որ իրենք դեմ են իշխանությունների հետ բանակցություններին:

Past.am-ի հարցին՝ ինչպիսի՞ն է իր վերաբերմունքն այն ընդդիմադիրներին, ովքեր հանդիպեցին Սերժ Սարգսյանի հետ, Հովհաննիսյանը պատասխանեց. «Անձամբ ոչինչ չունեմ այդ մարդկանց դեմ, բայց իրենք պետք է հասկանան, որ անցան մի կարմիր գիծ, որից հետո կարող են դադարել ընդդիմադիր ներկայանալը: Նրանք գնացին ոչ թե երկխոսության, այլ մենախոսության: Այդ մենախոսությանը նրանք մասնակցեցին շատ կասկածելի պարագայում: Ազգի վզին փաթաթվող չարեփոխումների շուրջ բանակցության գնացին: Սա արդեն հստակ չափորոշիչ է: Չեմ կարծում, որ նրանք դա կարողանան մարսել»:

«Հայազն»-ի ներկայացուցիչները կօգտվեն պայքարի ավանդական մեթոդից՝ցույցեր կանեն, բայց նշեցին, որ ցանկանում են նաև մի նոր խոսք ասել հանրությանը:

Լևոն Փանոսյան