Ո՞րն է աոողջապահության զարգացման բանալին՝ ըստ «Երիտասարդ բժիշկների ասոցիացիայի»

Սեպտեմբերի 30-ին և հոկտեմբերի 1-ին տեղի ունեցավ «Երիտասարդ բժիշկների հայկական ասոցիացիայի» «Ապագայի բժշկություն. համատեղ հայացք համընդհանուր խնդրին» տարեկան 3-րդ գիտաժողովը:Այն նվիրված էր ՀՀ անկախության 25-ամյակին: Գիտաժողովի ընթացքում ամփոփվեցին մեր անկախ պետության առողջապահական համակարգի ձեռքբերումներն ու մատնանշվեցին բացթողումները:

Նկատենք, որ ելույթները և զեկույցները մեծ հետաքրքրություն առաջացրեցին, զեկուցողներին ուղղվում էին բավական սուր հարցեր: Առանձին անդրադարձ եղավ մի քանի ոլորտների՝ առողջապահության կազմակերպում, ուռուցքաբանական հիվանդություններ, մանկաբարձություն և գինեկոլոգիա, պլաստիկ և էսթետիկ վիրաբուժություն, ստոմատոլոգիա և դիմածնոտային վիրաբուժություն, լաբորատոր և ճառագայթային ախտորոշում, ներքին օրգանների հիվանդություններ:

Խոսվեց ուռուցքային հիվանդությունների ժամանակ միկրովիրաբուժական տեխնոլոգիաների կիրառման հնարավորությունների, օնկոգինեկոլոգիայում լապորոսկոպիկ վիրահատությունների խնդրի, կրծքագեղձի մետաստատիկ քաղցկեղի բուժման հնարավորությունների մասին: Գիտաժողովի շրջանակներում անցկացվեց նաև երիտասարդ մասնագետների կողմից ներկայացվող կլինիկական դեպքերի ներկայացման մրցույթ «Ես եմ անկախության սերունդը» խորագրով` նվիրված ՀՀ անկախության 25-ամյակին:

«Երիտասարդ բժիշկների հայկական ասոցիացիայի» նախագահ Գևորգ Գրիգորյանը Past.am-ի հետ զրույցում ընդգծեց, որ միջոցառումն ունի կրթական նպատակ: Այն, ըստ Գրիգորյանի, վեր է հանում բժշկության արդի խնդիրերը: «Մենք տրամադրում ենք համապատասխան հարթակ, որտեղ մասնագետները կարողանում են ներկայացնել սեփական առաջարկները և լուծում տալ հարցերին, որոնք առնչվում են առօրյա բժշկությանը»,- նշեց պարոն Գրիգորյանը՝ հավելելով, որ զարգացման բանալին պետական համակարգի և հասարակական հատվածի համագործակցության մեջ է:

Մեր զրուցակիցը ողջունեց գիտաժողովին երիտասարդների ակտիվ մասնակցությունը: «Մենք նույնպես ժամանակին, երբ ավելի երիտասարդ էինք, մասնակցում էինք նման գիտաժողովների: Պետք է կարողանանք սերմանել ապացուցողական բժշկության հիմունքները նոր սերնդի մեջ»,-իր խոսքը եզրափակեց բժիշկը:

 

Տեղեկացնենք, որ գիտաժողովը կայացել է «Պլաստիկ վիրաբույժների հայկական ասոցիացիայի», «Ռադիոլոգների հայկական ասոցիացիայի», «Ուռուցքաբանների հայկական ասոցիացիայի», «Գինեկոլոգների հայկական ասոցիացիայի», «Օնկոհոգեբանների հայկական ասոցիացիայի» մասնակցությամբ:

Բոլոր մասնակիցներին տրվել են վկայականներ:

Լևոն Փանոսյան