Հույս ունեմ, որ ես կհաղթեմ այդ պայքարում. Լիանան նշում է ծննդյան 36-ամյակը

ЛАЙФ 11 Октябрь, 2016 16:27

Այսօր երգչուհի Լիանան նշում է ծննդյան 36-ամյակը: Երգչուհին Life.panorama.am-ին պատմել է, որ տոնական օրվա մեկնարկը տրվել է անակնկալներով.

«Շատ հաճելի է, երբ ծննդյանդ օրը ստանում ես ջերմ ու անկեղծ շնորհավորանքներ, դրանք ինձ համար առավել քան թանկ են: Օրս սկսել է տպավորիչ անակնկալներով՝ ուղիղ կեսգիշերին Միացյալ նահանգներում ապրող ընկերուհիս նվերներ էր ուղարկել մեր տուն, դուռը բացելուն պես շատ շոյվեցի,- նշեց Լիանան ու շարունակեց.

«Գիտեք՝ իրականում ես ավելի շատ սիրում եմ նվերներ տալ, քան ստանալ, սակայն երբ քո մտերիմներն են քեզ նվերներ մատուցում, որոնց անկեղծության վրա մեկ տոկոս անգամ չես կասկածում, դա իսկապես շատ հաճելի է, հետո մտերիմներդ քեզ լավ ճանաչելով՝ գիտեն ինչպես ուրախացնեն»:

Խոսելով 4.5 տարեկան որդու շնորհավորանքից՝ երգչուհին ժպիտով նշեց.

«Տղաս իմ ձեռքբերումն է, իմ հարստությունը, իմ ուժը, այսօր ծնունդս նաեւ նրա գոյությամբ է նշանավորվում: Անկեղծ ասած՝ կեսգիշերին տղաս քնած էր, իսկ առավոտյան, երբ արթնացավ ու տեսավ ընկերուհուս ուղարկած գեղեցիկ փաթեթեավորված նվերները, անմիջապես զարմացավ, այդ ժամանակ ասացի, որ մայրիկի ծննդյան օրն է, դե իսկ նա էլ բոլոր երեխաների նման ուրախացած ասաց՝ «Մամ, էսօր տորթիկ ե՞նք ուտելու, մոմեր ե՞նք փչելու»: Ալենիս մի համբույրն ու ժպիտն անգամ ծննդյանս ամենաթանկ նվերն է»:

Լիանայի ամուսինը եւս կնոջը գեղեցիկ ծաղիկներ ու հաճելի նվեր է մատուցել, որի մասին երգչուհին չցանկացավ մանրամասնել:

36-ամյա Լիանան ինքն իրեն այսօր ամենակարեւորն է մաղթում՝ առողջություն.

«Անցած մեկ տարին ինձ համար այնքան էլ բարեհաջող չէր ու այնքան էլ լիաթոք չապրեցի, քանի որ առողջական խնդիրներ ունեմ, թեեւ ասում են, եթե ցավ զգում ես, ուրեմն ապրում ես, դա էլ է զգացողություն: Ինչեւէ, երիկամներիս հետ կապված խնդիրների դեմ շարունակում եմ պայքարել ու հույս ունեմ, որ ես կհաղթեմ այդ պայքարում: Այսօր ինքս ինձ առողջություն եմ մաղթում, նաեւ ուզում եմ, որ շրջապատված լինեմ այնպիսի մարդկանցով, որոնց պետք եմ ու ովքեր ինձ են պետք, ոչ թե նրանցով, ովքեր իմ մասին հիշում են, երբ տեսահոլովակ եմ նկարահանում: Ինքս ինձ նաեւ մի փոքր ավելի փող եմ մաղթում, քանի որ գումարի դեպքում ավելի շատ կաշխատեմ իմ հանդիսատեսի համար»,- նշեց հոբելյարը:

Ի դեպ՝ Լիանան նվերներ մատուցելու սովորությանը համապատասխան՝ ծննդյան օրը երկրպագուներին նոր երգ է նվիրել: «Թող լինի միշտ այդպես» երգի խոսքերի հեղինակը Սուրեն Հովհաննիսյանն է, երաժշտության հեղինակը` Արա Հովհաննիսյանը: Գործիքավորումը կատարել է Արմեն Սարգսյանը, իսկ ձայնագրությունը` Արսեն Բարսամյանը:

Հեղինակ՝ Անուշիկ Մելքոնյան