Էկոկրթությունը պետք է լինի մեր հանրության կենտրոնական հարցերից մեկը. Մինասյան
ՄՇԱԿՈՒՅԹՀայաստանի բնության պետական թանգարանում հունիսի 5-ին տեղի ունեցավ շրջակա միջավայրի համաշխարհային օրվան և բնապահպանի օրվան նվիրված տոնական միջոցառում: Շրջակա միջավայրի համաշխարհային օրվա այս տարվա կարգախոսն է «Ես բնության հետ եմ»:
«Արմենպրես»-ի հաղորդմամբ` միջոցառմանը ներկա էր ՀՀ բնապահպանության նախարար Արծվիկ Մինասյանը:
«Դպրոցից սկսած մինչև բարձրագույն օղակ էկոկրթությունը, էկոդաստիարակությունը պետք է լինի մեր հանրության կենտրոնական հարցերից մեկը: Պետք է մանկուց երեխայի մեջ դաստիարակենք, նրան փոխանցենք բնության հետ ներդաշնակ ապրելու կարողությունը»,- ընդգծեց Մինասյանը:
ՄԱԿ-ի զարգացման ծրագրերի մշտական ներկայացուցչի տեղակալ Դմիտրի Մարիասին շնորհավորեց բոլորին այս տոնական օրվա կապակցությամբ և նշեց, որ այս տարի շեշտը դրված է քաղաքային միջավայրին:
«Ցավոք, քաղաքային բնակչությունը կտրված է բնությունից: Պետք է հասկանանք, թե ինչքանով է մարդկությունը կապված բնության հետ, ուստի բնության պահպանության հարցը ոչ միայն բնապահպանների գործն է, այլև մեր բոլորինը»,- ասաց Մարիասին:
Այնուհետև Բնապահպանության նախարարը շնորհակալագրեր հանձնեց նախարարության աշխատակազմի մի շարք ծառայողների:
Միջոցառմանը ներկա էին «Զատիկ» երեխաների աջակցության կենտրոնի երեխաները, ինչպես նաև Շենգավիթի պատանեկության ստեղծագործական կենտրոնի սաները, ովքեր ցուցադրեցին վանդակներում պահվող էկզոտիկ կենդանիներին:
Վերջում «Մաքուր Հայաստան» ծրագրի շրջանակում ՀՀ բնապահպանության նախարարության աշխատակիցները և կամավորները երթ կազմակերպեցին՝ նախարարության տարածքը մաքրելու նպատակով: