Հերթական ոչինչ չասող հայտարարությունը ԵԱՀԿ Մինսկի խմբից
ՎԵՐԼՈՒԾԱԿԱՆpast.am-ը գրում է.
ԵԱՀԿ Մինսկի խմբի համանախագահներ Իգոր Պոպովը, Ստեֆան Վիսկոնտին, Էնդրյու Շոֆերը ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ միասին փետրվարի 7-ին Բաքվում հանդիպել են նախագահ Իլհամ Ալիևին և փետրվարի 9-ին Երևանում նախագահ Սերժ Սարգսյանին: Երկու մայրաքաղաքներում նրանք խորհդակցություններ են անցկացրել արտաքին գործերի նախարարների հետ: Համանախագահները փետրվարի 9-11-ին եղել են նաև Լեռնային Ղարաբաղում, հանդիպել են դե ֆակտո իշխանություններին և եղել Զանգելանում, Կուբաթլիում, Աղդամում, Լաչինում և Քելբաջարում:
Համանախագահներն ընդգծել են 2017 թվաանի հոկտեմբերին Ժնևի, ինչպես նաև նախորդ՝ մասնավորապես Վիեննայի և Սանկտ Պետերբուրգի գագաթնաժողովներում ստանձնած բոլոր պարտավորությունների կատարման անհրաժեշտությունը: Համանախագահները խորն անհանգստույթուն են հայտնել վերջերս շփման գծում զոհի կապակցությամբ: Համանախագահները կողմերին կոչ են արել լրացուցիչ քայլեր ձեռնարկել լարվածությունը թուլացնելու համար, ինչպես պայմանավորվել են Ժնևում, և հարգել հրադադարը: Համանախագահները կողմերին կոչ են արել նաև զերծ մնալ սադրիչ հայտարարություններից և գործողություններից:
ԵԱՀԿ Մինսկի խումբն, այսպիսով, հերթական ոչինչ չասող հայտարարությունն է տարածում: Իհարկե, ավելին սպասել հնարավոր չէ: Մյուս կողմից էլ ավելին պահանջելը դժվար է, հաշվի առնելով, թե ինչպես է ադրբեջանական կողմը փորձում վիժեցնել համանախագահների ֆորմատը:
Ամեն դեպքում, գնալով պարզ է դառնում, որ արցախյան խնդիրը մտել է փակուղի: Մանավանդ Ալիևի վերջին հայտարարությունները վերահաստատում են այդ միտումը: Որևէ լուծում այս պահին չկա, իսկ Ադրբեջանը չնայած այս պահին համակերպվել է ստատուս քվոյին, բայց հնարավորության ու հարմար պահի դեպքում կիրագործի իր ռազմական նկրտումները:
Սարգիս Մեսրոպյան