«Պրովոկացիա՝ երեք ուղղություններով». «Փաստ»
ՔԱՂԱՔԱԿԱՆ«Փաստ» օրաթերթը գրում է.
Երեկ Ազգային ժողովում ԱԺ փոխխոսնակ Էդուարդ Շարմազանովը հայտարարել է, որ հին կառավարությունը նոր կառավարությանը ժառանգել է 7.5 տոկոս տնտեսական աճով երկիր, և նոր կառավարությունը հիմա կարող է նաև բարձրացնել թոշակները: Հայաստանի գործատուների հանրապետական միության նախագահ Գագիկ Մակարյանը ԱԺ փոխխոսնակի հայտարարության մեջ հիմքեր չի տեսնում: «Ես այդ հայտարարության մեջ պրովոկացիա եմ տեսնում, ընդ որում՝ երեք տեսակի: Նախ՝ Է. Շարմազանովն ուզում է նոր կառավարությանը «թասիբի» գցել այն հնարավոր ցանկությամբ, որ կառավարությունը խրվի ինչ–որ պրոցեսների մեջ ու տակից դուրս չգա: Երկրորդ պրովոկացիան ներկայացնելն է, որ իրենք բավարար մակարդակի են հանձնել երկիրը, ինչն այդպես չէ: Երրորդ պրովոկացիան PR–ի իմաստով է: Այսինքն՝ որ իրենք աշխատել են ու այդպիսի պետություն են հանձնել»,–«Փաստ»–ի հետ զրույցում ասաց Գ. Մակարյանը: Նրա խոսքով՝ վարչապետ Նիկոլ Փաշինյանի թիմը թոշակները կարող է բարձրացնել միայն այն դեպքում, երբ վերացնեն մենաշնորհները. «Այդ պարագայում կունենա հաշվարկ, թե, ենթադրաբար, որքա՞ն լրացուցիչ հարկեր պետք է մտնեն բյուջե»: Գագիկ Մակարյանը շեշտեց՝ 7 տոկոս ակտիվության ցուցանիշը թոշակներ բարձրացնելու հնարավորություն չի ստեղծում: «Դա կստացվի, երբ լրացուցիչ հարկեր հավաքվեն, որը պետք է Նիկոլ Փաշինյանի թիմի շնորհքը լինի, և ոչ թե նախորդ կառավարության ապահոված տնտեսական աճի: Իսկ աճ իսկապես եղել է: Նախորդ կառավարությունը կարողացավ ավելի շատ հարկեր հավաքել: Բայց, միևնույն է, պետք է հաշվարկել, թե այդ գումարները որքանո՞վ են թույլ տալիս բարձրացնել թոշակները կամ աշխատավարձերը: Մեր և տարբեր միջազգային կառույցների գնահատականներով՝ ՀՀ–ում ՀՆԱ–ի նկատմամբ գոյություն ունի մինչև 45 տոկոս ստվեր: Մեր հաշվարկով ՀՀ բյուջեն ոչ թե 2,8 միլիարդ պետք է լինի, այլ 4 միլիարդ: Իսկ ՀՆԱ–ն ոչ թե 12 միլիարդ, այլ 15 միլիարդ հենց այսօրվա վիճակով: Սա է իրական ցուցանիշը: Բայց նախորդ կառավարությունը նման ցուցանիշներով չի հանձնել: Նախորդ կառավարությունը չէր էլ կարող ստվերների դեմ պայքարել, ավելի ճիշտ՝ իրենց այն ընկերների, որոնք դեռ շարունակում են այդ համակարգում մնալ: Այդ պատճառով էլ նշված գումարները չեն հավաքվում: Իսկ հիմա խոշոր հարկատուները սկսել են քայլեր կատարել, մոնոպոլիաներից հեռանալ, թափանցիկ աշխատելու քայլեր անել: Այսօր իմացանք, որ խոշոր հարկատուներից մեկը բանկից քարտեր է վերցրել, որ աշխատավարձերը թափանցիկ վճարի»,–հայտնեց մեր զրուցակիցը: Նա մեջբերեց ԱԱԾ պետի հայտարարությունը, ըստ որի՝ ՀՀ–ում 350 մարդ կա, որոնց անունով բիզնեսներ են բացված. «Երբ այդ «սուտ ու մութ» անունները բացահայտվեն, և գումարները բյուջե մտնեն, Ն. Փաշինյանը կարող է թոշակները բարձրացնել: Իսկ դա արդեն ոչ թե 7 տոկոս տնտեսական աճի շնորհիվ կլինի, այլ Ն. Փաշինյանի՝ ստվերի, կոռուպցիայի և մոնոպոլիաների դեմ պաքայրի նոր մոդելի»:
Շարունակությունը՝ «Փաստ» օրաթերթի այսօրվա համարում