Ամուլսարում որևէ գործողություն չենք կարող իրականացնել, եթե չունենք դրա համար դե յուրե հիմնավորում, այլապես կսկսվի ամենաթողություն. Նիկոլ Փաշինյան
ՔԱՂԱՔԱԿԱՆԱմուլսարի հանքի շահագործման հարցով Բնապահպանական տեսչությունը ստուգումներ է իրականացնում, և իրավիճակը քննվում է:
Այս մասին ֆեյսբուքյան ուղիղ հեռարձակման ժամանակ ասաց ՀՀ վարչապետ Նիկոլ Փաշինյանը՝ պատասխանելով օգտատերերից մեկի այն դիտարկմանը, թե եթե Փաշինյանը ընդդիմադիր լիներ, Ամուլսարի հանքը չէր շահագործվի:
«Ինչպես անենք, որ Դուք մեկ օրով ընդդիմադիր դառնաք և փակենք Ամուլսարի թեման»,-գրել էր օգտատերը: Ի պատասխան՝ Նիկոլ Փաշինյանն ասաց, որ եթե իր վարչապետ դառնալուց հետո սկիզբ դրվեր հանքի շահագործմանը, ապա դա ինքը թույլ չէր տա, որովհետև աբսուրդ է Հայաստանի առողջարանային կենտրոններից մեկի տարածքում հանքարդյունաբերություն ձևավորել, ինչպիսին էլ այն լինի:
«Բայց կա նաև երկրորդ խնդիր, որ մենք որևէ գործություն չենք կարող իրականացնել, եթե չունենք դրա համար դե յուրե հիմնավորում:
Հիմա ասում են՝ գնացեք, փակեք հանքը: Գնա՞նք, փակե՞նք առանց հիմնավորման. ամենաթողությունը հենց այդ ժամանակ է ստեղծվում, ձեզ թվում է՝ ամենաթողություն անողները հայտարարո՞ւմ են, որ իրենք գնում են, ամենաթողություն սկսեն:
Այսօր Ամուլսարն ենք փակում վարչապետի կամքով, հետո մի օր վարչապետի կամքով լրատվամիջոց կփակենք, հետո մարդկանց կփակենք վարչապետի կամքով, և սա ամենաթողություն է»,-ասաց Փաշինյանը:
Նա ասաց, որ ցավում է, որ իր՝ Ջերմուկ այցի ժամանակ «Լիդիան Արմենիա» ընկերությունը կառուցողական մոտեցում չի ցուցաբերել, իսկ հանքի շահագործումը ցավոտ հարց է, որը պետք է լուծվի օրենքի տառին համապատասխան:
Փաշինյանը նաև նշեց, որ ի վերջո, «Լիդիան Արմենիա» ընկերությունն էլ հայտնում է, որ իրենք ունեն նախորդ կառավարության թույլտվությունը՝ 370 մլն դոլար ներդրում անելու և հանքը շահագործելու համար: