Ով իրեն ազգային համաձայնության կառավարությունից դուրս է զգում, ոչ մեկին չենք պահում. Նիկոլ Փաշինյան
ՔԱՂԱՔԱԿԱՆՏավուշի մարզ կատարած այցը վարչապետ Նիկոլ Փաշինյանն ամփոփեց լրագրողների հետ հարցուպատասխանով, որի շրջանակում էլ հայտարարեց՝ Հայաստանի Հանրապետությունում կոալիցիա չկա: Սա նրա պատասխանն էր հարցին, թե ինչ կարծիքի է այն մասին, որ ազգային համաձայնության կառավարությունում կոալիցիայի մաս կազմող «Դաշնակցությունը» քաղաքական որակեց ՀՀ երկրորդ նախագահի կալանավորումը:
«Այսինքն՝ դա թյուրըմբռնում է, մենք փորձ ենք արել Ազգային համաձայնության կառավարություն ձևավորել, ով իրեն դուրս է զգում Ազգային համաձայնությունից, մենք ոչ մեկին չենք բռնել և չենք պահում,»-հայտարարեց վարչապետը:
Հիշեցնենք, որ երեկ ՀՅԴ Բյուրոյի ներկայացուցիչ Հրանտ Մարգարյանը հայտարարել էր, որ Հայաստանում «մտքի տեռոր» է իրականացվում։ Իսկ համատեքստը ՀՀ երկրորդ նախագահ Ռոբերտ Քոչարյանի կալանավորման վերաբերյալ ՀՅԴ հայտարարությանը հաջորդած քննադատական արձագանքներն էին:
Փաշինյանի բրյուսելյան այցից հետո շատ է խոսվում, որ Հայաստանը Եվրամիությունից շատ լուրջ աջակցություն է ակնկալում, հատկապես ենթակառուցվածքների: Լրագրողի հարցին ու դիտարկմանը, որ ոչ պաշտոնապես շրջանառվում է մինչև 1 միլիարդ եվրոյի աջակցության չափ, Նիկոլ Փաշինյանը նկատեց. «Հիմա փոխվարչապետ Մհեր Գրիգորյանի գրասենյակը և կառավարության ներկայացուցիչները Եվրամիության հետ աշխատում են այդ ուղղությամբ, և տպավորություն ունեմ, որ այս աշխատանքը կառուցողական է ընթանում: Եվ հույս ունեմ, որ այդ աշխատանքը արդյունավետ կլինի»:
Ամեն դեպքում, Նիկոլ Փաշինյանը գումարի վերաբերյալ հարցին չպատասխանեց և հավելեց, որ գումար չի կարող նշել: Վարչապետը հավելեց, որ Հայաստանի զարգացման հենասյուներից մեկը համարում են «Էկո Հայաստանի» կայացումը:
«Տեսեք, երբ մենք ասում ենք ներառող տնտեսական աճ, ի՞նչ նկատի ունենք: Նկատի ունենք, որ ինչ-որ ընկերություն ընդերքի արտահանմամբ ստանում է գերշահույթներ, որոնք, մեծ հաշվով, և, այո, ապահովում են տնտեսական աճի ցուցանիշներ, բայց նրանք հանրային կյանքի նկատմամբ չունեն այնպիսի ազդեցություն, ինչպիսին պետք է ունենան: Եվ Ձեզ ասեմ, որ մետաղական հանքերում լինելու են շատ լուրջ ստուգումներ: Բացառում եմ, որ լինի այնպիսի հանք, որ խուսափի այս ստուգումներից: Մենք տվյալներ ունենք իրական, պետության առաջ ունեցած պարտավորությունների թերկատարումների մասին»,-ավելացրեց Նիկոլ Փաշինյանը:
Նա հավաստիացրեց, որ բոլոր թերակատարումները կատարվելու են: Իսկ ռազամավարական առումով չի համարում, թե հանքարդյունաբերությունը Հայաստանի տնտեսության ապագան է: Բայցև՝ իրավիճակը մի օրում հնարավոր չի փոխել: Իսկ Հայաստանի տնտեսական ապագան, ըստ վարչապետի՝ բարձր տեխնոլոգիական արտադրանքի թողարկումնն է:
Խորհրդարանական ընտրությունների ժամկետի վերաբերյալ հարցին էլ ի պատասխան՝ նա ասաց՝ այս պահին կարող եմ ասել, որ հաջորդ ամիս չի լինի:
Նիկոլ Փաշինյանը լրագրողներին ասաց, որ երկու օր առաջ Պետական եկամուտների կոմիտեին հանձնարական է տվել, որ օրինական անհրաժեշտության մեկնաբանությունները չլինեն այնպիսին, որ իրական վնաս հասցնեն տնտեսությանը և բիզնեսին: «Եվ առանձնահատուկ ուզում եմ շեշտել, որ հանձնարականը եղել է, որ հատկապես միկրոբիզնեսի և արտադրության նկատմամբ վարարությունը լինի հավասարակշռված և չլինի կոշտ: Կրկնում եմ՝ խոսքը վերաբերում է միկրոբիզնեսին»:
«Դիլիջան ազգային պարկի», Հաղարծին և այլ գյուղերի բնակիչների հետ վերջին շրջանում ստեղծված իրավիճակի հետ կապված էլ Նիկոլ Փաշինյանը նշեց, որ մարզային պաշտոնյաների ու բնակիչների մասնակցությամբ հարցուպատասխանի ձևաչափով հանդիպում ունեցավ, նաև ելույթում անդրադարձավ անտառահատման թեմային: Այն է՝տավուշցին և հաղարծինցին, որ տարիներ շարունակ իր սոցիալական խնդիրները հաղթահարել է անտառի շնորհիվ և հաշվին, պետք է փոխի տրամաբանությունը:
«Այդ ծրագրով կֆինանսավորվեն Հաղարծնի այն բնակիչները, ովքեր կներկայացնեն նորովի ապրելու իրենց կյանքը կառուցելու ծրագիր, ովքեր կորոշեն՝ առանց բնությանը վնասելու նոր գործունեություն սկսել: Չգիտեմ՝ բացել չրանոց, անասնապահությամբ զբաղվել»,-իր խոսքը վարչապետ Նիկոլ Փաշինյանը ավարտեց կոչով՝ անջատել «դրուժբաները» և միացնել միտքը:
Հիշեցնենք, որ վարչապետ Նիկոլ Փաշինյանը Տավուշում մի քանի անգամ կրկնեց, որ մարզ դատարկ ձեռքերով չի եկել և ունի 140 հազար դոլար արժողությամբ ծրագիր:
Երբ վարչապետին տեղեկացրեցին, որ կան աշխատողներ, որոնք ամիսը 5-10 հազար դրամ աշխատավարձ են ստանում, նա հարց տվեց՝ իսկ մարզպետարաններում, դպրոցներում, քանի՞ աշխատող կա, որոնց հաստիքների կարիքը չկա, բայց նրանց ընդունել են:
«Ստանում են ինչ–որ աշխատավարձ, բայց էդ բոլոր հաստիքների գոյության արդյունքում ունենում ենք էդպիսի իրավիճակներ: Մենք այսօր պետք է գնանք մի ճանապարհով, մենք այսօր կարող ենք ունենալ խոհարար, խոհարարի օգնական, հետո մի «իքս» պահի կարող ենք մտածել, որ 2-րդ օգնական ունենանք»,-նկատեց վարչապետ Նիկոլ Փաշինյանը: