Թուրքիան ի պատասխան ԱՄՆ պատժամիջոցների պատրաստվում է հրաժարվել ամերիկյան շինանյութերից․ թուրք նախարար
ՄԻՋԱԶԳԱՅԻՆԹուրքիան ի պատասխան Միացյալ Նահանգների պատժամիջոցների պատրաստվում է հրաժարվել ամերիկյան շինանյութերից, այս մասին հայտարարել է Թուրքիայի շրջակա միջավայրի և քաղաքաշինության նախարար Մուրադ Քուրումը, գրում է թուրքական «Աքշամ» պարբերականը։
«Այսուհետ ցանկացած տիպի շինարարական աշխատանքներում կբացառվի ամերիկյան շինանյութի օգտագործումը»,- ասել է նախարարը։
Հիշեցնենք, որ օրերս ԱՄՆ-ը կրկնապատկել է Թուրքիայից ալյումինի ու պողպատի ներկրման համար մաքսատուրքերը, ինչպես նաև Թուրքիայում ամերիկացի հոգևորականի կալանավորման շուրջ տարաձայնությունների ֆոնին նոր պատժամիջոցներ է սահմանել Անկարայի նկատմամբ:
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ երկիրը կբոյկոտի ԱՄՆ-ում արտադրվող էլեկտրատեխնիկան։
Էրդողանը մանրամասնել էր, որ Թուրքիան համապատասխան քայլեր է ձեռնարկում տնտեսությունը կայուն պահելու համար:
Նշենք, որ անցյալ շաբաթ թուրքական լիրան գրանցել է արագընթաց անկում դոլարի նկատմամբ՝ արձանագրելով նոր ռեկորդ․ նախօրեին մեկ դոլարը Թուրքիայում վաճառվել է 6,8 թուրքական լիրայով։ Հիշեցնենք, որ նախորդ շաբաթ մեկ դոլարը 5 լիրա արժեր, իսկ անցյալ ամիս՝ 4,5-4,8 լիրա