ԱՄՆ-ն պատրաստ է նոր պատժամիջոցներ կիրառել Թուրքիայի դեմ, եթե քահանա Բրանսոնն ազատ չարձակվի
ՄԻՋԱԶԳԱՅԻՆՄիացյալ նահանգները սպառնում են նոր պատժամիջոցներ կիրառել Թուրքիայի դեմ, եթե Իզմիրում կալանքի տակ մնալ շարունակող ամերիկացի հոգևորական Էնդրյու Բրանսոնն անհապաղ ազատ չարձակվի, այս մասին գրում է թուրքական «Հյուրրիյեթ» պարբերականը։
ԱՄՆ ֆինանսների նախարար Սթիվեն Մնուչինն արդեն հայտնել է, որ իրենք պատրաստել են լրացուցիչ պատժամիջոցների փաթեթ, որն առանց վարանելու կկիրառվի, եթե քահանա Բրանսոնը չհայտնվի ազատության մեջ։
Նշենք, որ նախօրեին թուրքական դատարանը կրկին մերժել է Էնդրյու Բրանսոնի՝ որպես նախնական խափանման միջոց տնային կալանքն ու նրա հանդեպ սահմանված երկրի դուրս գալու արգելքը չեղարկելու մասին նրա փաստաբանների ներկայացրած միջնորդությունը։
Հիշեցնենք, որ օրերս ԱՄՆ-ն կրկնապատկել է Թուրքիայից ալյումինի ու պողպատի ներկրման համար մաքսատուրքերը, ինչպես նաև Թուրքիայում ամերիկացի հոգևորականի կալանավորման շուրջ տարաձայնությունների ֆոնին նոր պատժամիջոցներ է սահմանել Անկարայի նկատմամբ:
Ի պատասխան դրա՝ Թուրքիան հայտարարել է ամերիկյան շինանյութն ու էլեկտրատեխնիկան բոյկոտելու, ինչպես նաև բազմաթիվ ամերիկյան ապրանքների ներկրման մաքսատուրքերի բարձրացման մասին։