ՀՔԾ-ը լրացրել է ՀՀ երկրորդ նախագահ Ռոբերտ Քոչարյանի մեղադրանքը. փաստաբան
ՔԱՂԱՔԱԿԱՆՀատուկ քննչական ծառայությունը (ՀՔԾ) լրացրել է Հայաստանի երկրորդ նախագահ Ռոբերտ Քոչարյանի մեղադրանքը։
Այս մասին տեղեկությունը Tert.am-ի հետ զրույցում հաստատեց Ռոբերտ Քոչարյանի փաստաբաններից Հովհաննես Խուդոյանը։
Հովհաննես Խուդոյանը նշեց, որ առաջադրված մեղադրանքում ուղղակի փոփոխություններ են արվել, դրվագներ ավելացվել, բայց հրաժարվեց բովանդակությունը ներկայացնել:
«Նոր բացահայտումներ չկան, բովանդակային ինչ-որ լրացումներ են արվել, բայց նորություն չէ, ինչը որ նախկինում հրապարկվել է, դրանք են ավելացվել»,- ասաց նա:
Ըստ փաստաբանի՝ Ռոբերտ Քոչարյանի մեղադրանքը դրանով հանդերձ չի փոփոխվել: «Իր մասով փոփոխություն չի արվել, առաջադրված մեղադրանքը նույն հոդվածով է շարունակում մնալ, ուղղակի մեջը որոշակի տվյալներ են ավելացրել գործի ընթացքի վերաբերյալ»,- ասաց նա:
Հիշեցնենք, որ 2008թ-ի «Մարտի 1»-ի գործով ՀՔԾ-ում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: