Քայլարշավի մասնակիցների 90 տոկոսի համար էլ էր անհասկանալի, թե իրենք ինչի համար են քայլարշավին մասնակցում. Ստեփան Դանիելյան
ՔԱՂԱՔԱԿԱՆԻմ կարծիքով` մարդկանց համար նոյեմբերի 24-ին Նիկոլ Փաշինյանի և «Իմ քայլը» դաշինքի երթը անհասկանալի էր, և կազմակերպիչները ավելի շատ մարդ էին ակնկալում, քան եղավ: Այս մասին Tert.am-ի հետ զրույցում ասաց քաղաքագետ Ստեփան Դանիելյանը` գնահատելով ՀՀ վարչապետի պաշտոնակատար Նիկոլ Փաշինյանի գլխավորած համաերևանյան երթին մարդկանց մասնակցությունը:
«Մարդկանց համար անհասկանալի է երթի նպատակը, իմաստը, պարզ չէր՝ երթ անողը ընդդիմադի՞ր ուժ է, թե՞ իշխանական ուժ: Կարծում եմ, որ կազմակերպիչները պարզապես ցանկանում էին հոգեբանական առումով հիշեցնել ապրիլյան օրերը և, անհասկանալի պատճառներով, գուցե այդքան էլ վստահ չեն իրենց վրա: Հոգեբանական առումով իրենք չեն ընկալում, որ իշխանություն են»,-ասաց նա և նշեց, որ քայլարշավի մասնակիցների 90 տոկոսի համար էլ էր անհասկանալի, թե իրենք ինչի համար են քայլարշավին մասնակցում, և իրենց նպատակը չստացվեց:
Ստեփան Դանիելյանը անհասկանալի համարեց նաև քարոզարշավի ժամկետները խախտելը և նշեց, որ երթը կազմակերպողը ադեկվատ որոշում չի կայացրել, իսկ մնացածներն էլ ենթարկվել են:
Ինչ վերաբերում է իշխանության կողմից այն արդարացմանը, թե մյուս քաղաքական ուժերի դեպքում նույնիսկ այդքան մարդ չի գնա, քաղաքագետը դա անսպասելի իրավիճակից դուրս գալու պատճառ համարեց :«Ինչ-որ բաներ են ասում` այդ ամենը բացատրելու համար»,- ասաց նա: