Գեղարքունիքի մարզում իրականացվում են ճանապարհների մաքրման եւ մշակման աշխատանքներ
ОБЩЕСТВОԳեղարքունիքի մարզի որոշ հատվածներում դեկտեմբերի 12-ի գիշերվա ընթացքում ձյան տեսքով տեղումներ են թափվել, ինչի արդյունքում ձեւավորվել է ձյան կամ մերկասառույցի շերտ՝ որոշակի դժվարություն ստեղծելով ճանապարհատրանսպորտային երթեւեկության համար: Ինչպես տեղեկացրեց Գեղարքունիքի մարզպետարանի քաղաքաշինության վարչության տրանսպորտի եւ ճանապարհաշինության բաժնի վարիչ Գեւորգ Խաչատրյանը, առավել շատ տեղումներ գրանցվել են Սեւան-Հրազդան ճանապարհահատվածում եւ Ծովագյուղի տարածքում ու Վարդենյաց լեռնանցքում, որտեղ ձյան շերտը կազմել է 15-20 սանտիմետր:
Ճամբարակի լեռնանցքում ու Գավառի տարածքում ձյան շերտը կազմել է մի քանի սանտիմետր, սակայն ճանապարհներին մերկասառույց է ձեւավորվել: Մարտունու տարածքում ձյան տեղումներն սկսվել են վաղ առավոտից, իսկ Վարդենիսի տարածքում դրանք դեռ չկան: Ճամբարակի տարածքում էլ առայժմ անձրեւ է տեղում: «Գիշերվա ժամերին եւ առավոտյան կատարվել են ճանապարհների մաքրման եւ մշակման աշխատանքներ: Բոլոր ուղղություններում էլ ճանապարհները մնում են բաց ու երթեւեկելի: Դժվարանցանելի է մնում միայն Վարդենյաց լեռնանցքը, որտեղ եւս իրականացվում են մաքրման եւ մշակման աշխատանքներ: Այսօր սպասում ենք նոր տեղումների»,-նշեց Գեւորգ Խաչատրյանը:
Խոսրով Խլղաթյան