Եկեղեցին ու պետությունը տարանջատված են, ԱԱԾ-ն եկեղեցում անելիք չունի. Արթուր Վանեցյան
ՀԱՍԱՐԱԿՈՒԹՅՈՒՆԱԱԾ-ն եկեղեցում անելիք չունի. այս մասին այսօր Ծաղկաձորում լրագրողների հետ զրույցում ասաց ԱԱԾ տնօրեն Արթուր Վանեցյանը՝ անդրադառնալով հարցին,թե «Նոր Հայաստան,նոր հայրապետ» նախաձեռնության անդամների մասնակցությամբ միջադեպ է գրանցվել։
«Հայ առաքելական եկեղեցին մեր ամենաբարձր արժեքներից մեկն է։ «Նոր Հայաստան, նոր հայրապետ» շարժումը սկսվել է մայիսից։ Գիտեք, եկեղեցին և պետությունը տարանջատված են, և մենք որևէ իրավասություն չունենք խառնվել եկեղեցու գործերին»,-ասաց Արթուր Վանեցյանը։
ԱԱԾ տնօրենի խոսքով՝ իրենց գործառույթն է ապահովել եկեղեցու ծառայողների անվտանգությունը , և եթե շարժման անդամները չեն ենթարկվել ոստիկանության օրինական պահանջներին,ապա պետք է ենթարկվեն պատասխանատվության, արարքը դատապարտվել է։
Արթուր Վանեցյանն ասաց, որ Ամենայն հայոց կաթողիկոս Գարեգին Բ-ի հետ հանդիպմանը, ի թիվս այլ հարցերի, քննարկել են նաև այդ հարցը, և Վեհափառն իրեն հավաստիացրել է, որ եկեղեցին այնքան ուժ ունի, որպեսզի այդ հարցերը լուծի։
«ԱԱԾ-ն այս պահին եկեղեցում անելիք չունի»,-ասաց Արթուր Վանեցյանը։
Հիշեցնենք,որ «Նոր Հայաստան, նոր հայրապետ» նախաձեռնության անդամները շարունակում են իրենց ակցիաները: Նրանք պահանջում են Ամենայն Հայոց կաթողիկոս Գարեգին 2-րդի հրաժարականը:
Այսօր ակցիան սկսվել է Երևանում, սակայն հետագայում ավտոերթով մեկնել են Էջմիածին: Ակցիայի մասնակիցները փորձել են իրենց բողոքի ձայնը հայտնել հենց Մայր Աթոռի մոտ, սակայն Մայր աթոռի մոտ հավաքված մարդկանց հետ հրմշտոց է սկսվել մուտքին մոտենալիս,երկու հոգի բերվել է ոստիկանություն։