Ես հպարտանում եմ իմ մամուլի խոսնակով. Դավիթ Սանասարյան
ՀԱՍԱՐԱԿՈՒԹՅՈՒՆԱյսօր՝ հունվարի 11-ին, Պետական վերահսկողության ծառայության ղեկավար Դավիթ Սանասարյանը, ամփոփելով նախորդ տարվա ուսումնասիրությունները, ասուլիս էր հրավիրել: Լրագրողները հարց բարձրացրին մամուլում տարածված այն լուրերի վերաբերյալ, թե Պետական վերահսկողական ծառայության ղեկավարի մամուլի խոսնակ Զարուհի Մեժլումյանն( Մհեր Ենոքյանի կինն է, զբաղվել է նրա պաշտպանությամբ) օգտագործում է վարչական լծակներ՝ Իոսիֆ Աղաջանովի սպանության մեջ մեղադրված ու ցմահ ազատազրկման դատապարտված Մհեր Ենոքյանին արդարացնելու համար:
«Դա չի համապատասխանում իրականությանը: Նման բան չկա: Նախ ես հպարտանում եմ իմ մամուլի խոսնակով, իր ծառայությունը նա բավականին բարձր մակարդակի է իրականացնում: Եվ նրա ծառայությունը բացառապես Պետական վերահսկողական ծաառայության ֆունկցիաների մեջ է մտնում: Ես գիտեմ ինչ մանիպուլյատորներ են փորձում էտ ամեն ինչը անել: Էս երկու օրը կեղծ բարեպաշտները փորձում են բարձր արժեքներից խոսան ու ինչ-որ սլաքներ են ուղղում»,- ասաց Դավիթ Սանասարյանը: Հիշեցնենք, որ ըստ վճռի՝ Ենոքյանը, հանցավոր համաձայնության գալով ընկերոջ՝ Արամ Հարությունյանի հետ, 1996թ. հուլիսի 12-ին՝ ժամը 17-ի սահմաններում, իր համակուրսեցի Իոսիֆ Աղաջանովին խաբեությամբ տարել է Արամ Հարությունյանի Երևան քաղաքի Նորքի 7-րդ զանգվածի 21 շենքի թիվ 18 բնակարան, վերջինիս սպանելու ու դիակը վերադարձնելու համար նրա հորից 20.000 ԱՄՆ դոլար պահանջելու և շահադիտական դրդումներով նախապես թաքցրած տեղից վերցրել է երկաթյա պտուտակող բանալին և հարվածել Իոսիֆ Աղաջանովի գլխի ու ողնաշարի հատման շրջանում և տեսնելով, որ այդ հարվածով չի սպանել նրան, դրսևորելով առանձնակի դաժանություն, նույն երկաթյա բանալիով շարունակել է հարվածել Իոսիֆ Աղաջանովի գլխի տարբեր մասերին, այնուհետև ձեռք գցելով նրա պարանոցին, փորձել է խեղդամահ անել: Արդյունքի չհասնելով՝ Արամ Հարությունյանից դանակ է պահանջել և դանակով մահացու հարվածներ հասցրել Իոսիֆ Աղաջանովի դեմքի ու պարանոցի շրջանում, որից հետո արդեն իսկ հատակին ընկած Իոսիֆ Աղաջանովի կոկորդը դանակով կտրել է Արամ Հարությունյանը: Շահադիտական դրդումներով և առանձնակի դաժանությամբ Իոսիֆ Աղաջանովին սպանելուց հետո նրա դիակը տեղավորել են նախապես այդ նպատակով գնած պայուսակի մեջ և այն տնից տեղափոխելով՝ թաքցրել են Երևան քաղաքի Նորքի 8-րդ զանգվածի շրջակայքում՝ քարերի տակ։
Ինքը՝ Մհեր Ենոքյանը, այժմ չի ընդունում իր մեղքը, սակայն ժամանակին նա ինքնախոստովանական ցուցմունք այդ մեղադրանքի մասով տվել է։