Չկա այնպիսի մեկը, որն ալկոհոլ չի օգտագործում. իսկ որքանո՞վ է այն վնասակար
ԼԱՅՖՄենք գիտենք, որ...
Ալկոհոլն օրգանիզմին միայն վնաս է տալիս և... ոչ մի օգուտ:
Իրականում այդպես չէ:
Թեպետ օրգանիզմի վրա ալկոհոլի ազդեցության մեխանիզմների հարցը շատ արդիական է համարվում, այնուամենայնիվ, այս հարցը դեռևս խորությամբ ուսումնասիրված չէ: Իրականում ուսումնասիրված ու ապացուցված են միայն ալկոհոլի մեծ քանակի վնասակար ազդեցությունները, իսկ փոքր չափաբաժիններինը՝ ոչ: Կարելի է անվերջ պնդել, որ ալկոհոլը վնասակար է, այսինքն՝ ոչ բնական սնունդ է օրգանիզմի համար, բայց փաստն այն է, որ մարդու օրգանիզմը անգամ հատուկ ֆերմենտ ունի սրա համար՝ ալկոհոլօքսիդազան: Բանն այն է, որ եթե ինչ– որ մեկը ձեզ փորձի ապացուցել, որ ինքն ընդհանրապես ալկոհոլ չի օգտագործում, ուրեմն՝ նա ստում է: Ալկոհոլի՝ էթանոլի հետքեր առկա են մրգերում՝ հատկապես գերհասունացած: Իհարկե, ալկոհոլային խմիչքներում էթանոլի քանակը անհամեմատ ավելի մեծ է, բայց այն փոքր քանակներով պարունակում է նաև ոչ ալկոհոլային խմիչքներում, օրինակ՝ կեֆիրի մեջ դրա քանակը 0,12 % է, իսկ մի քիչ թթված կեֆիրում՝ անգամ 1 %, կումիսում 1–3 % է, կվասում՝ մինչև 1,2 % և այլն: Այնպես որ, այն պնդումը, որ ալկոհոլը վտանգավոր է անգամ փոքր չափաբաժիններով, միանշանակ սխալ է: Վերջիվերջո չպետք է մոռանալ, որ ցանկացած բան էլ մեծ չափաբաժիններով վտանգավոր է, ամեն ինչ պետք է լինի նորմայի սահմաններում: Ալկոհոլը, ինչպես և, օրինակ, գլ յուկոզան կամ ճարպը, օրգանիզմում տրոհվում է մինչև ացետիլ– ԿօԱ–ի, որն էլ հենց հանդիսանում է էներգիայի աղբյուր: Էթանոլի (սպիրտի) էներգետիկ արժեքը 7 կկալ/գրամ է, համեմատության համար նշենք, որ ճարպերինը 9.29 կկալ/գրամ է, իսկ սպիտակուցներինը և ածխաջրատներինը՝ 4.1 կկալ/գրամ: Ստացվում է, որ ալկոհոլը օրգանիզմի համար բավականին հաջող էներգիայի աղբյուր է՝ մանավանդ հաշվի առնելով այն, որ օրգանիզմում ամենահեշտը տրոհվում են առավել ցածր էներգետիկ արժեք ունեցող ածխաջրատները և բարձր էներգետիկ արժեքով էթանոլը: Այս ամենը լավ են իմացել մեր պապերը, և միշտ էլ ընդունված է եղել ծանր ֆիզիկական աշխատանք կատարելիս և նախաճաշին ու ճաշին մեկ–երկու բաժակ օղի կամ գինի օգտագործելը:
Ալկոհոլի և առողջության միջև կապի հետազոտություն է իրականացրել ապացուցողական բժշկության կնքահայր Արչի Կոկրեյնը: 1979 թվականին նա փորձել է պարզել այն, թե ինչու աշխարհի 18 երկրներում տարբեր է սրտի հիվանդություններից մահացության մակարդակը: Իրականացված հետազոտությունը հայտնաբերել է կապ սպիրտային խմիչքների, մասնավորապես գինու օգտագործման և սրտի իշեմիկ հիվանդության առաջացման դեպքերի անկման հետ: Ստացվում է, որ գինու չափավոր օգտագործումը նվազեցնում է ինֆարկտի առաջացման հավանականությունը: Սա կոչվել է ֆրանսիական պարադոքս: Բանն այն է, որ ֆրանսիացիները շատ են ուտում կալորիական սնունդ՝ միաժամանակ ըմպելով կարմիր չոր գինի: Միևնույն ժամանակ նրանք անգամ մրգեր ուտելիս են կարմիր գինի խմում, և արդյունքում նրանց մոտ ցածր է սրտի հիվանդությունների քանակը: Սա հանրահայտ փաստ է:
Հանրահայտ է, որ ալկոհոլի փոքր չափաբաժինները բերում են օրգանիզմի ռելաքսացիայի, չեզոքացնում են լարվածությունը և խրոնիկ հոգնածությունը: Այն նաև մտերմացնում է մարդկանց, կապող օղակ է անծանոթ մարդկանց համար, և ընկերախմբում մի քանի բաժակ խմելու դեպքում ժամանակը ուրախ է անցնում, ավելանում է սրամտությունը, անկեղծությունը, կոմֆորտը և այլն: Որոշ հետազոտողների կարծիքով, ալկոհոլի փոքր չափաբաժինները բարելավում են ուղեղի աշխատանքը, նման մարդիկ ավելի քիչ են հիվանդանում Պարկինսոնի և Այցհեյմերի հիվանդությամբ: Իհարկե, այս ամենով հանդերձ, չպետք է մոռանալ նաև ալկոհոլի բոլոր հանրահայտ բացասական կողմերը:
Կամո Խաչիկյան