«Մենք պետք է քաղցենք, որպեսզի մեկը կշտանա». բաց նամակ՝ Աննա Հակոբյանին
ԲԼՈԳՄի խումբ քրիստոնյա կանայք բաց նամակով դիմել են ՀՀ վարչապետի տիկին Աննա Հակոբյանին: Նամակում մասնավորաբար ասված է.
«Սիրելի տիկին Աննա Հակոբյան.
Մի խումբ քրիստոնյա տիկնանց անունից, և ոչ միայն անունից, այլ նրանց սրտում եղած մտահոգությունից դրդված, դիմում ենք ձեզ` խնդրանք - առաջարկով:
Քանի որ 2019թ. Հայոց Հայրապետի օրհնությամբ համարվեց ընտանիքի տարի, ուստի մենք` յուրաքանչյուրս` որպես առանձին ընտանիքների մայրեր որոշեցինք հանդես գալ մի առաջարկությամբ: Խնդրում ենք ձեզ՝բացել մի հաշվեհամար, որտեղ կարվեն ներդրումներ` անտուն ընտանիքներին տնով ապահովելու նպատակով: Մենք սիրով հրաժարվում ենք մարտի 8-ից ապրիլի 7-նընկած ժամանակահատվածում բոլոր նվերներից, ծաղիկներից, անակնկալներից և առհասարակ որևէ նյութական նվիրատվությունից, որը արվելու է մեզ համար որպես գնահատանք` կանանց և Ավետման տոնի առթիվ: Առավել քան վստահ ենք, որ մեր մտահոգությունը և առաջարկը հավանության կարժանանա շատերի կողմից և ինքներս` մեզ զրկելով ժամանակավոր հաճույքներից, կարող ենք ժպիտ պարգևել մի երեխայի, թեթևացնել հոգսը` մի կնոջ, երջանկություն պարգևել մեկ ընտանիքի, որի անունով կոչվեց 2019 թվականը: Խոսքը ավելի արժեքավոր է դառնում, երբ վերածվում է գործի: Մենք պետք է քաղցենք, որպեսզի մեկը կշտանա... Սիրով սպասում ենք ձեր արձագանքին:
Շնորհակալություն ձեզ տիկին Աննա տիկնանց անունից, ակնկալում ենք ձեր միջամտությունը այս հարցին ընթացք տալու գործում:
Մի խումբ քրիստոնյա կանայք»: