ԱՄՆ նախկին փոխնախագահն ապրիլին կարող է հայտարարել 2020-ի նախագահական ընտրություններին մասնակցելու մասին
ՄԻՋԱԶԳԱՅԻՆԱՄՆ նախկին փոխնախագահ Ջո Բայդենն ապրիլին կարող է հայտարարել 2020 թվականի նախագահական ընտրություններին Դեմոկրատական կուսակցության կողմից առաջադրվելու մասին: Այդ մասին Коммерсант-ի փոխանցմամբ` հայտնում է CBS հեռուստաընկերությունը:
Աղբյուրի հաղորդմամբ` Բայդենը գտնվում է նախապատրաստական վերջին փուլում: Քաղաքական գործիչն արդեն խորհրդակցել է որոշ մարդկանց հետ` սոցիալական ցանցերում նախընտրական քարոզարշավի անցկացման մանրամասների վերաբերյալ: Այժմ նա ակտիվ քննարկումների փուլում է` նախընտրական շտաբի ձևավորման շուրջ: Ըստ աղբյուրների` Բայդենի նախընտրական շտաբը կարող է ղեկավարել նրա օգնական Գրեգ Շուլցը:
Նշվում է, որ ԱՄՆ Դաշնային ընտրական հանձնաժողովի հրապարակած տվյալների համաձայն` երկրում նախագահի պաշտոնի համար պաշտոնապես գրանցված թեկնածուների թիվը հասել է 500-ի: Հունվարի 20-ի դրությամբ` ընտրական հանձնաժողով փաստաթղթեր է ներկայացրել 471 թեկնածու` 143 դեմոկրատ, 64 հանրապետական, 18 ազատական, 10 թեկնածու` Կանաչների կուսակցությունից: Մյուսները կամ անկախ թեկնածուներ են, կամ ներկայացնում են այլ կուսակցություններ: