Լիբիայում տեղի ունեցող բախումների հետևանքով 21 մարդ է մահացել
ՄԻՋԱԶԳԱՅԻՆՏրիպոլիում գեներալ Հաֆթարի բանակի և կառավարությանը հավատարիմ զինվորականների միջև բախումների հետևանքով 21 մարդ է զոհվել, ևս 27-ը վիրավորվել են: Այս մասին հայտնում է РИА Новости-ն՝ մեջբերելով Լիբիայի առողջապահության նախարարության տվյալները:
Ավելի ուշ, Լիբիայում ՄԱԿ-ի առաքելությունը պահանջել է հակամարտության կողմերից երկժամյա հրադադար սահմանել Տրիպոլիի հարավային հատվածում՝ տուժածների տարհանումը հնարավոր դարձնելու նպատակով:
Կառավարական զինված ուժերն ավելի վաղ հայտարարել էին Հաֆթար խալիֆայի ղեկավարության տակ գտնվող Լիբիական ազգային բանակի դեմ «Ցասման հրաբուխ» անվանումն ստացած ռազմարշավը սկսելու մասին: Լիբիական ազգային բանակն, իր հերթին, օդային ռազմարշավ է սկսել Տրիպոլիի երկնքում:
Հինգշաբթի գեներալ Հաֆթարը հրամայել է գրոհ սկսել Տրիպոլիի դեմ՝ «այն ահաբեկիչներից ազատագրելու համար»: Երկրում երկիշխանություն է տիրում՝ արևելքում իշխում է ընտրված խորհրդարանը, իսկ Տրիպոլիում, այսինքն՝ արևմուտքում՝ ՄԱԿ-ի և ԵՄ-ի աջակցությամբ կազմավորված կառավարությունը: Արևելյան հատվածի իշխանությունները գործում են Տրիպոլիից անկախ և համագործակցում են Լիբիական ազգային բանակի հետ: