«Այն ժամանակ ֆիզիկապես սպանեցին ազգին, հիմա էլ ուզում են հոգեպես սպանե՞լ»
ՀԱՐՑԱԶՐՈՒՅՑ«Կարին» ավանդական երգի ու պարի համույթի գեղարվեստական ղեկավար Գագիկ Գինոսյանն, անդրադառնալով նախօրեին ԱԺ-ի մոտ ինքնաբուխ կազմակերպված բողոքի ակցիային, մեզ հետ զրույցում նշեց, որ ժողովուրդը հավաքվել է ոչ թե ասելու՝ տրանսգենդեր մի՛ եղիր, այլ ցույց տալու, որ թույլ չի տա նման քարոզներով խաթարել հասարակության բնականոն կյանքը:
«ԱԺ-ն այն ամբիոնը չի, որտեղից պետք է նման մարդիկ ելույթ ունենան: Իրավունքները խախտվելու ժամանակ նման մարդիկ պետք է դիմեն իրավապահ մարմիններին, ոչ թե գան խորհրդարան: Եթե ոստիկանությունը կարգի չհրավիրի նրանց իրավունքները ոտնահարողներին, այդ ժամանակ արդեն կարող են խոսել մարդու իրավունքների մասին: Այսինքն, գոյություն ունի օրենք, որը բոլորի համար է, անկախ նրանից, թե նորմալ մարդ ես, աստվածավախ ես, թե ոչ: Այսինքն, մարդու իրավունքները խախտվելու դեպքում պատիժ սահմանող օրգանը ոչ թե Ազգային ժողովն է, այլ ոստիկանությունը»,- ասաց Գ. Գինոսյանը:
Նա նաև նշեց, որ շատ այլ հարցեր էլ կան, որոնք հաշվի չեն առնվում: Օրինակ, որ այն, ինչ ընդունելի է եվրոպական երկրներում ապրող շատ մարդկանց համար, ընդունելի չէ մեր ժողովրդի համար: Եվ դա ամենևին էլ չի նշանակում, որ Եվրոպան դրանով առաջ է գնացել, իսկ մենք մնացել ենք քարե դարում:
«Վերջապես, կան հարցեր, որոնք մեր ազգի համար կործանարար են: Պետք է հասկանալ նաև, որ հոմոսեքսուալները միայնակ չեն նման բաներով զբաղվում: Եվ այս պարագայում ո՞վ կարող է վստահ լինել, որ նման մարդիկ իրենց սեռական հաճույքները բավարարելու համար ավանդական հայացքներ ունեցող մեկին ևս չեն պղծի: Հարց է ծագում, թե այդ դեպքում նույն այդ Եվրոպան նման ոտնձգություններից մեզ պաշտպանո՞ւմ է, թե՞ կարծում է, որ նրանց համար իրավունքներ կան, իսկ սովորական մարդկանց համար՝ չկան»,- ասաց Գ. Գինոսյանը:
Համույթի ղեկավարը նշեց նաև, որ ժողովուրդը փաստորեն այս ակցիայով ցուց է տալիս, որ չի ընդունում նման արժեքները և դրանց դեմ պատրաստ է անվերջ ընդվզել:
«Հոկտեմբերի 27-ը բավարար չէ՞ր հասկանալու համար, որ պատահական մարդիկ չպետք է մուտք գործեն Ազգային ժողով: Այն ժամանակ ֆիզիկապես սպանեցին ազգին, հիմա էլ ուզում են հոգեպես սպանել »,ասաց Գ. Գինոսյանը: