«Զատկին հաջորդող հիշատակության օրը պետք էր դարձնել ոչ աշխատանքային»
ՀԱՍԱՐԱԿՈՒԹՅՈՒՆՕրերս «Փաստ» օրաթերթն անդրադարձել էր Հայ առաքելական եկեղեցու հինգ տաղավար տոներին հաջորդող երկուշաբթիները ոչ աշխատանքային օր սահմանելու և դրանք որևէ շաբաթ օր տեղափոխելու թեմային: Այս հարցի շուրջ մշտապես տարակարծություն կա: Խնդիրն, իհարկե, բազմաշերտ է: Մի կողմից՝ պետության վերաբերմունքն ավանդույթներին, մյուս կողմից էլ կարծիքը, որ ոչ աշխատանքային օրերն ավելորդ շռայլություն են երկրի համար: Բայց նշենք, որ գոնե հիշատակության օրերի դեպքում խոսքը բացառապես աշխատանքային օրերը տեղափոխելու մասին է: Արդեն իսկ պարզ է, որ նոր իշխանություններն արդեն երկրորդ տաղավար տոնի պարագայում ձեռնպահ են մնում Մեռելոցը ոչ աշխատանքային սահմանել:
Հայաստանյայց առաքելական եկեղեցու Գուգարաց թեմի առաջնորդ Տեր Սեպուհ արքեպիսկոպոս Չուլջյանը «Փաստի» հետ զրույցում նշում է, որ հիշատակության օրերը պետք է պահպանվեն:
«Ես պնդում եմ, որ Զատկին հաջորդող մեռելոց-հիշատակության օրը պետք է պահպանվեր, և այդ կերպ, տարվա մեջ գոնե մի քանի անգամ, հասարակությանը հնարավորություն պետք է տրվեր, որ հիշեն և հարգեն իրենց ննջեցյալներին: Ազգային ավանդույթները պետք է ավելի զորացնել, պանծացնել և ոչ թե մեր կենցաղավարությունից դուրս մղել: Ի վերջո, եկեղեցական և ազգային ավանդույթները մեր ինքնության բաղկացուցիչներն են: Մենք, մոռանալով այդ արժեքները, կուրանանք մեր ինքնությունը», - ասում է Սեպուհ սրբազանը:
Տնտեսագետ Կառլեն Խաչատրյանի հետ զրույցում անդրադարձանք հարցի տնտեսական կողմին, թե արդյոք մի քանի աշխատանքային օրերի տեղափոխումը կարո՞ղ է պարալիզացնել տնտեսությունը:
«Իմ սուբյեկտիվ կարծիքով, մեր տիպի երկրների համար որքան քիչ լինեն ոչ աշխատանքային, տոն օրերը, այնքան ավելի լավ, որ տնտեսությունն աշխատի, հավել յալ արդյունք ստեղծի, զարգանա: Այդ առումով կարևոր է՝ որքան հնարավոր է քիչ ոչ աշխատանքային օրեր ունենալը: Իսկ կոնկրետ տաղավար տոներին հաջորդող երկուշաբթի օրը ոչ աշխատանքային լինել-չլինելու հարցը կդժվարանամ մեկնաբանել: Բայց պետք է նշել, որ նախկինում ոչ աշխատանքային օրը շաբաթ օր տեղափոխելով, փաստացի, տարվա մեջ աշխատանքային օրերի քանակը չէր փոխվում, ուղղակի երկուշաբթի օրը տեղափոխվում էր շաբաթ՝ հնարավորություն տալով քաղաքացիներին առանց անհարմարությունների այցելել ննջեցյալներին: Այժմյան կառավարությունը հարցի հետ կապված ուրիշ դիրքորոշում ունի և որոշել է այս երկուշաբթին աշխատանքային թողնել:
Շաբաթ օրը ֆինանսական, տնտեսական բոլոր ինստիտուտները լիարժեքորեն աշխատում են, այս դեպքում աշխատանքի պարալիզացման խնդիր չեմ տեսնում: Չեմ կարծում, որ աշխատանքային մի քանի օրվա տեղափոխումը կարող է վնաս հասցնել տնտեսությանը», - ասում է տնտեսագետը:
Հ. Գ. Պետությունը պետք է հարգի ազգային ավանդույթները, հավատացյալ ժողովրդի զգացմունքները: Մի քանի աշխատանքային օրերի փաստացի տեղափոխությունը առանցքային նշանակություն չի ունենա, հատկապես այն դեպքում, երբ, միևնույն է, անխափան աշխատում են շտապօգնությունը, փրկարար ծառայությունը, ոստիկանությունը, հերթապահություն է սահմանվում մաքսային ծառայությունում: Բայց մեկ դիտարկում ևս. ոչ պետական համակարգում աշխատող մարդիկ հաճախ աշխատում են առանց շաբաթ-կիրակի և տոն օրերի: Այս դեպքում արդեն պետք է բարեխիղճ լինեն տնտեսվարողները՝ հնարավորություն տալով իրենց աշխատակիցներին այցելելու հարազատների շիրիմներին: Ի վերջո, ննջեցյալների հիշատակության օրերն աշխատանքային դարձնելն արտահայտում է պետության վերաբերմունքը եկեղեցու և հավատացյալ ժողովրդի նկատմամբ:
ԼՈՒՍԻՆԵ ԱՌԱՔԵԼՅԱՆ