«Հուավեյը» անհանգստության պատճա՞ռ
ՔԱՂԱՔԱԿԱՆՄայիսի 26-ին Երևանում էր Չինաստանի արտաքին գործերի նախարար Վան Իի գլխավորած պատվիրակությունը: Վան Ին մի շարք հանդիպումներ ունեցավ ՀՀ ղեկավարության՝ նախագահ Արմեն Սարգսյանի, վարչապետ Նիկոլ Փաշինյանի և այլ պաշտոնյաների հետ: «Փաստ» թերթը պարզել է, որ հայկական և չինական կողմերի տարածած պաշտոնական հաղորդագրություններում առկա է որոշակի տարբերություն: Մասնավորապես՝ պարզվում է, որ ըստ չինական «Սինխուա» գործակալության հաղորդագրության, նախագահ Սարգսյանն անդրադարձել է չինական «Հուավեյ» կորպորացիային, որն, ինչպես հայտնի է, խորը կոնֆլիկտի պատճառ է դարձել Չինաստանի և ԱՄՆ-ի միջև և ներկայումս գտնվում է պատժամիջոցների տակ: Երբ կառավարությունից իմացել են, որ նախագահը ներդրումների մասով խոսել է այս թեմայի շուրջ, բավականին կտրուկ են արձագանքել այդ փաստին, որովհետև անցանկալի է ԱՄՆ-ի հետ հարաբերություններում հերթական անգամ տհաճ վիճակում հայտնվել: Վան Իի հետ հանդիպման ժամանակ վարչապետ Փաշինյանն այդ թեմայի մասին ընդհանրապես չի խոսել, ավելին՝ հայաստանյան պաշտոնական հաղորդագրություններից «Հուավեյի» մասին բոլոր հիշատակումները հանվել են: