Իտալական առաքելություն՝ Հայաստանում. ի՞նչ ենք առաջարկում մենք և ի՞նչն են կարևորում իտալացիները
ՔԱՂԱՔԱԿԱՆԻր տեսակի մեջ առաջին անգամ հայիտալական բիզնես ֆորումը Հայաստան է բերել իտալացի ձեռներեցների, բիզնես կազմակերպիչների ու կազմակերպությունների: Իտալացիները Հայաստանում են՝ ուսումնասիրելու շուկան, ունեն նաև գաղափարներ, բայց, ինչպես իրենք են նշում, կարևորը նաև բիզնես միջավայրն է, օրենսդրական դաշտը ու այն հանգամանքը, որ գործարարն իրեն ապահով զգա: Այդ պարագայում նյութական արդյունք գրանցելն ավելի հեշտ կլինի՝ արդարացիորեն նկատում են նրանք: Հայաստանում Իտալիայի դեսպան Վինչենցո Դել Մոնակոն կարծում է, որ Հայաստանը մեծ պոտենցիալ ունեցող երկիր է: Ինչպես ֆորումի սկզբում հայտարարեց դեսպանը, տնտեսական հարաբերությունները, որոնք գոյություն ունեն Երևանի և Հռոմի միջև, այս պահին խորանալու միտում ունեն:
Իր հերթին ՀՀ վարչապետ Նիկոլ Փաշինյանն իտալացի գործընկերներին հայտնեց տնտեսության թռիչքաձև զարգացման առաջնահերթության մասին: Ինչպես բոլոր բիզնես ֆորումներին, վարչապետն այս անգամ ևս հիշեցրեց, որ մեկ տարի առաջ Հայաստանում տեղի է ունեցել աննախադեպ, ոչ բռնի, թավշյա հեղափոխություն: «Նախորդ մեկ տարվա ընթացքում մենք կարողացել ենք քաղաքական առումով արմատախիլ անել համակարգային կոռուպցիան, մենաշնորհները։ Տեղի ունեցած հեղափոխությունն աննախադեպ է նաև նրանով, որ մենք չունենք սեփականության վերաբաշխման գեթ մեկ դեպք։ Հայաստանում տնտեսական ցնցումներ ընդհանրապես տեղի չունեցան, և տնտեսությունը գտնվում է աճի փուլում։ Այս պահին ունենք ՀՆԱ-ի 7,1% աճ, իսկ տնտեսական ակտիվության ցուցանիշը ապրիլ ամսին կազմել է 9,2%։ Մենք ասում ենք, որ Հայաստանը պատրաստվում ենք դրախտ դարձնել տաղանդավոր մարդկանց համար։ Մենք պատրաստվում ենք ստեղծել այնպիսի էկոհամակարգ, որ յուրաքանչյուր տաղանդավոր մարդ իր տաղանդն իրացնելու, հարստանալու և հարստացնելու հնարավորություն ունենա»,-ասաց Ն. Փաշինյանը՝ իտալացիներին հավաստիացնելով, որ Հայաստանում ճիշտ ժամանակին են հայտնվել: Իսկ ICE-ի (Իտալական առևտրի գործակալության) Մոսկվայի գրասենյակի տնօրեն Պիեր Պաոլո Չելեստեն խոսեց հեռանկարների մասին: «Կփորձենք նոր հնարավորություններ ստեղծել՝ ամրապնդելու նաև իտալական աճող արտահանումը դեպի Հայաստան:
Պետք է նշեմ, որ 2016թ. այդ ցուցանիշը կազմում էր 103 միլիոն եվրո, իսկ արդեն 2018 թ.-ին այն հասել է 140-ի: Արդեն 2019թ. առաջին ամիսներին իտալական արտահանումը դեպի Հայաստան աճել է 7,2 տոկոսով: Մեր տնտեսական և առևտրային հարաբերություններն էլ ավելի կզարգանան՝ մենք ունենք շատ հեռանկարներ հետագայում դրական ցուցանիշներ գրանցելու համար: Ձեր երկիրը վերջին տեխնոլոգիաների առումով մեծ առաջընթաց է ապահովում: Ինչպես Սանկտ Պետերբուրգում ասել էր պարոն Փաշինյանը՝ ձեր երկրի բարձր տեխնոլոգիաները բավականին մեծ զարգացում են ապրում, դրսևորում են մեծ պոտենցիալ»,-հիշեցրեց նա՝ ընդգծելով, որ առավել մեծ է հետաքրքրությունը հատկապես ինովացիաների զարգացման առումով:
«Մեծ է հետաքրքրությունը ձեր երկրում թվային տեխնոլոգիաների զարգացման առումով: Պետք է կենտրոնանանք ինովացիաների վրա և կարողանանք միջազգայնացնել այս ոլորտի ընկերությունների աշխատանքը: Հայաստանն անպայման մտնելու է այն երկրների ցանկը, որոնց հետ կուզենայինք աշխատել: Ինֆրաստրուկտուրաները, շրջակա միջավայրը և այլ նմանատիպ ուղղությունները պետք է ուշադրության հիմնական կենտրոնները դառնան, ըստ որի՝ իտալական և հայկական ընկերությունները նոր համագործակցության ուղղություններ կստեղծեն»,-ասաց նա:
Նկատենք, որ ֆորումի քննարկման, ուսումնասիրության ու գաղափարների դաշտը բավականին լայն է: Հետաքրքրությունը նաև տրանսպորտի, էներգետիկայի, շինարարության, խելացի քաղաքների և մի շարք այլ ենթակառուցվածքների տիրույթում է:
ԱՆՆԱ ԲԱԴԱԼՅԱՆ