Էլեկտրոնային գովազդային վահանակները պետք է աշխատեն մինչև ժամը 23:00-ն
ՀԱՍԱՐԱԿՈՒԹՅՈՒՆՄայրաքաղաքի ամենատարբեր հատվածներում տեղադրված են գովազդային վահանակներ: Էլեկտրոնային էկրանները տեղադրվում են վերգետնյա անցումների վրա, մայթերի տարբեր հատվածներում:
«Փաստի» ընթերցողներից մեկն ահազանգել էր, որ Աջափնյակում՝ իրենց բնակելի շենքի մոտ գտնվող վերգետնյա անցման վրա տեղադրված մեծ էկրանի լուսավորությունը խանգարում է շենքի բնակիչներին, հատկապես՝ երեկոյան ժամերին: Էլեկտրոնային էկրանների, շենքերից դրանց հեռավորության, լուսավորության չափորոշիչների մասին «Փաստը» մի քանի հարցադրում է ուղղել Երևանի քաղաքապետարանին:
Նախ հետաքրքրվել ենք՝ փողոցներում, վերգետնյա անցումների վրա տեղադրվող էկրանները վարչական շրջանների՞, թե՞ Երևանի քաղաքապետարանի սեփականությունն են: Քաղաքապետարանից պատասխանել են, որ թե՛ իրենք, թե՛ վարչական շրջանների աշխատակազմերը գովազդային վահանակներ չեն տնօրինում:
Հարցրել էինք՝ բնակելի շենքերից որքա՞ն հեռավորության վրա պետք է տեղադրվեն էլեկտրոնային էկրանները: Տեղեկանում ենք, որ դրանց տեղադրման չափորոշիչները սահմանված են Երևանի ավագանու 2009 թվականի նոյեմբերի 18-ի № 37-ն որոշման 42-րդ կետով, որտեղ, մասնավորապես, ասվում է. «Էկրանային (վերարտադրող) սարքավորումների մակերեսը որոշվում է էկրանի, վերարտադրվող պատկերի մակերեսով»:
Նշենք, որ Երևանում գովազդ տեղադրելու թույլտվությունը տալիս են մայրաքաղաքի վարչական շրջանների ղեկավարները:
Գովազդ, գովազդային միջոց տեղադրելու համար գովազդատուն, գովազդակիրը դիմում է ներկայացնում դրա տեղադրման վայրի համապատասխան վարչական շրջանի ղեկավարին, ում աշխատակազմը գովազդատուից, գովազդակրից դիմումը և անհրաժեշտ փաստաթղթերը ստանալուց հետո հինգօրյա ժամկետում պարզում է դրանց համապատասխանությունը պահանջներին:
Համապատասխանության դեպքում մեկ աշխատանքային օրվա ընթացքում ներկայացնում է Երևանի քաղաքապետարանի աշխատակազմի արտաքին ձևավորման և գովազդի վարչություն՝ ուրվանկարների և համապատասխան փորձաքննություն անցած մոնտաժային նախագծերի համաձայնեցման, անհրաժեշտության դեպքում նաև մի շարք հարցերի քննարկման համար:
Այնուհետև վարչությունը տալիս է գովազդը տեղադրելու համաձայնություն կամ մերժում այն: Օրինակ, էլեկտրոնային էկրաններ տեղադրելու թույլտվություն տրամադրելիս վարչությունը հաշվի է առնում մի շարք չափորոշիչներ, այդ թվում՝ դրանք կխանգարե՞ն հարակից շենքերի բնակիչներին, հետիոտներին, երթևեկությանը և այլն:
Ավագանու № 37 որոշման 33-րդ կետի առաջին մասը հստակ սահմանում է, որ գովազդ չի թույլատրվում տեղադրել բնակելի շենքերի մոտ, եթե դրանք հանդիսանում են աղմուկի, տատանման, հզոր ճառագայթման և էլեկտրամագնիսական դաշտի, ուժեղ լույսի, այդ թվում՝ տատանվող աղբյուր:
Նույն որոշման 32-րդ կետն էլ սահմանում է, որ գովազդի միջոցները չպետք է խոչընդոտեն ճանապարհային երթևեկության ապահովմանն ու անվտանգությանը, սահմանափակեն տեսանելիությունը ավտոճանապարհների վրա, առաջացնեն երթևեկության մասնակիցների կուրացում (լույսով, այդ թվում՝ նաև անդրադարձող) և այլն:
Ինչ վերաբերում է էլեկտրոնային էկրանների լուսավորության չափորոշիչներին, ապա այս հարցը կարգավորվում է ՀՀ քաղաքաշինության նախարարի 1996 թվականի «ՀՀ շինարարական նորմեր, արհեստական և բնական լուսավորում» № 82 հրամանի «Ճարտարապետական, ցուցափեղկային և գովազդային լուսավորման բաժին» 6.58 կետով, որը սահմանում է էլեկտրոնային գովազդային վահանակների առավելագույն պայծառության թույլատրելի արժեքները:
Դրանց լուսավորության պայծառությունը կախված է գովազդային օբյեկտի մակերեսից, փողոցների և հրապարակների տեսակից:
Հավելենք նաև, որ Երևանի քաղաքապետարանից տեղեկացնում են, որ էլեկտրոնային գովազդային վահանակների աշխատանքային ժամերը սահմանափակված են մինչև 23:00-ն: Երևանում գովազդի տեղադրման գործընթացի նկատմամբ հսկողությունն օրենքով սահմանված կարգով իրականացնում է Երևանի վարչական շրջանի ղեկավարը, իսկ վերահսկողությունը՝ Երևանի քաղաքապետը, ուստի կարծում ենք, որ էկրանների հետ առաջացած խնդիրների վերաբերյալ մեր համաքաղաքացիները կարող են ահազանգել վարչական շրջանների ղեկավարների և քաղաքապետի աշխատակազմերին:
Հ. Գ. Երևանի քաղաքապետարանի նախաձեռնությամբ սկսվել է վերգետնյա և ստորգետնյա անցումների, ինչպես նաև կամուրջների և ուղեանցների (թունելների) ճակատային հատվածներում տեղադրված անօրինական գովազդների ապամոնտաժումը:
Գույքագրված թվով 13 գովազդային պաստառներից 7-ն ապամոնտաժվել է: Առաջիկայում կապամոնտաժվեն նաև մյուս պաստառները:
ԼՈՒՍԻՆԵ ԱՌԱՔԵԼՅԱՆ