ԱԺ-ի օրակարգում չկա Ստամբուլյան կոնվենցիան. Լուսինե Բադալյան (տեսանյութ)
ՎԻԴԵՈԲաղրամյան պողոտայում այսօր` հուլիսի 28-ին, Վարդավառի տոնի կապակցությամբ պատգամավորները գորգեր են լվանում: Պատգամավորներից ներկա է նաև Լուսինե Բադալյանը: Նրա խոսքով նման միջոցառումները շատ կարևոր են:
News.am-ի լրագրողի այն դիտարկմանը, թե կարծիքներ կան, որ նման միջոցառումներով փորձում են հանրության ուշադրությունը շեղել այնպիսի կարևոր հարցերից, ինչպիսին, օրինակ, Ստամբուլյան կոնվենցիան է, պատգամավորն ասաց.
«Ես չեմ հասկանում, թե ինչու է մեր մեջ ամրապնդվել Ստամբուլյան կոնվենցիա վերնագիրը: Դա կանանց նկատմամբ բռնության, ընտանեկան բռնության կանխարգելման և դրա դեմ պայքարի միջոցներ մշակելու կոնվենցիան է: Ես ամբողջությամբ ուսումնասիրել եմ կոնվենցիան, և որևիցե մի բան չեմ գտել, որը մեծ քննարկումների տեղիք կտար: Հետևաբար, չեմ կարծում, որ շեղելու խնդիր ունեինք: Ճիշտ հակառակը, մենք ունենք խնդիր բացատրելու, թե այս արհեստածին, կեղծ օրակարգն ինչ է ներկայացնում իրենից: ԱԺ օրակարգում չկա Ստամբուլյան կոնվենցիան կամ կանանց բռնությունների դեմ կոնվենցիան: Բայց օրակարգ մտնելու դեպքում էլ պետք է քննարկենք, հետևաբար շեղելու որևէ խնդիր չկար»,- ասաց Լուսինե Բադալյանը:
Անդրադառնալով եղեղեցու՝ կոնվենցիան չվավերացնելու հայտարարությանը, պատգամավորը նշեց, որ կցանկանար հոգևորականների հետ քննարկում ունենալ՝ հասկանալու համար, թե որն է խնդիրը: Նա նաև հավելեց, որ խնդիրն ամենայն հավանականությամբ տեղնիկական է՝ ոչ ճիշտ թարգմանության արդյունք: