Ինչպե՞ս վաճառել բնակարանը, եթե համասեփականատերերից մեկը բացակայում է
«Փաստ» օրաթերթը շարունակում է ներկայացնել «Ճանաչեք և պաշտպանեք ձեր իրավունքները» խորագիրը: Շատ են դեպքերը, երբ քաղաքացիները չեն կարողանում պաշտպանել իրենց իրավունքները, քանի որ իրազեկված չեն, իսկ երբեմն էլ որոշ պետական հիմնարկներ էլ ավելի են շփոթեցնում նրանց:
Օրաթերթը, համագործակցելով ՀՀ փաստաբանների պալատի հետ, այսուհետ հանրային իրազեկման արշավ է կազմակերպում, որը կօգնի մեր քաղաքացիներին իմանալ և պաշտպանել իրենց իրավունքները: Նշենք նաև, որ յուրաքանչյուր հինգշաբթի՝ ժամը 10:00-ից մինչև 17:00-ն փաստաբանների պալատի հանրային պաշտպանի գրասենյակն անվճար խորհրդատվություն է տրամադրում ՀՀ բոլոր քաղաքացիներին:
Հարցը «Փաստի» խմբագրությանն ուղարկել է մեր ընթերցողներից Արևիկ Կամավոսյանը (անուն-ազգանունը փոխված է-խմբ.)
Իմ հայրիկը արդեն 17 տարի է՝ ապրում է Ռուսաստանում, մայրիկիս հետ զագսավորված են: Հայրիկիս կողմից, կարելի է ասել, ոչ մի օգնություն չենք ստացել: Մայրս առողջական խնդիրներ ունի և ուզում է վաճառել տունը, սակայն հորս հետ համասեփականատեր են: Ունենք տան գրքույկը: Ոնց կարելի է այս հարցին լուծում տալ, որ մայրս կարողանա վաճառել տունը:
Խնդրում եմ, եթե հնարավոր է, օգնեք:
Պատասխանում է փաստաբան Տաթևիկ Շալջյանը:
-Համաձայն ՀՀ քաղաքացիական օրենսգրքի 198-րդ հոդվածի` Համատեղ սեփականության մասնակիցները միասին տիրապետում և օգտագործում են ընդհանուր գույքը, եթե այլ բան նախատեսված չէ նրանց համաձայնությամբ: Համատեղ սեփականության ներքո գտնվող գույքը տնօրինվում է բոլոր մասնակիցների համաձայնությամբ, անկախ այն բանից, թե մասնակիցներից ով է կնքում գույքը տնօրինելու գործարքը:
Համատեղ սեփականության մասնակիցներից յուրաքանչյուրն իրավունք ունի կնքել ընդհանուր գույքը տնօրինելու գործարքներ, եթե այլ բան նախատեսված չէ նրանց համաձայնությամբ: Համատեղ սեփականության մասնակիցներից մեկի կողմից կնքված` ընդհանուր սեփականության տնօրինման գործարքը կարող է անվավեր ճանաչվել մնացած մասնակիցների պահանջով` գործարք կնքող մասնակցի մոտ անհրաժեշտ լիազորությունների բացակայության դեպքում, եթե ապացուցվի, որ գործարքի մյուս կողմն իմացել է կամ ակնհայտորեն պետք է իմանար այդ մասին:
Տվյալ դեպքում առանց Ձեր հոր համաձայնության հնարավոր չէ տվյալ անշարժ գույքն օտարել: Սակայն, համաձայն ՀՀ քաղաքացիական օրենսգրքի 199-րդ հոդվածի ` Համատեղ սեփականության մասնակիցների միջև ընդհանուր գույքը բաժանվում կամ նրանցից մեկի բաժինն առանձնացվում է ընդհանուր գույքի նկատմամբ իրավունքում մասնակիցներից յուրաքանչյուրի բաժինը նախապես որոշելուց հետո:
Ընդհանուր գույքը բաժանելիս և դրանից բաժին առանձնացնելիս համատեղ սեփականության մասնակիցների բաժինները համարվում են հավասար, եթե այլ բան նախատեսված չէ օրենքով կամ մասնակիցների համաձայնությամբ:
Տվյալ դեպքում, Ձեր մայրը կարող է դիմել դատարան համատեղ սեփականության ներքո գտնվող գույքից իր բաժինն առանձնացնելու, անհնարինության դեպքում հրապարակային սակարկությամբ վաճառելու պահանջով:
Իհարկե, տվյալ դեպքում սեփականության մյուս մասնակիցը ձեռք կբերի բաժնեմասը գնելու նախապատվության իրավունք, որի չիրացնելու դեպքում, դատարանը կարող է վճիռ կայացնել գույքը հրապարակային սակարկություններով վաճառելու մասին` ստացված գումարը հետագայում բաշխելով ընդհանուր սեփականության մասնակիցների միջև` նրանց բաժիններին համաչափ: