Իսպանիայում կինը խեղդամահ է արել իր փեսացուի 8-ամյա երեխային
ՄԻՋԱԶԳԱՅԻՆ
Իսպանիայի դատարանը մեղավոր է ճանաչել Անա Խուլիա Կասադային` իր փեսացուի 8-ամյա տղային` Գաբրիել Կրուսին սպանելու համար: Կնոջն սպասվում է ցմահ բանտարկություն: Այս մասին հայտնում է La Sexta-ն:
Հայտնի է, որ երեխան անհետացել էր 2018 թվականի փետրվարի 27-ին: Ենթադրվում էր, որ տղան կորել է, սակայն մարտի 11-ին ձերբակալվել էր Անա Կասադան, որը փորձել էր երեխայի մարմինը մեքենայով տեղափոխել այլ վայր: Մինչ այդ տղայի դին պահվել էր ագարակում:
Ալմերիա քաղաքում կայացած դատական նիստի ժամանակ Կասադան պնդել է, որ երեխայի մահը վրա է հասել դժբախտ պատահարի արդյունքում: Նա նշել է, որ վիճել է երեխայի հետ, փակել նրա բերանը, ինչի հետևանքով վերջինս շնչահեղձ է եղել: Դատարանը պարզել է, որ կինը ստում է: Նա ծեծել է երեխային և մի քանի անգամ նրան նետել գետնին, ապա մտածված փակել նրա քիթն ու բերանը:
Կասադան մեղավոր է ճանաչվել, և կարող է Իսպանիայում դառնալ առաջին կինը, որի նկատմամբ որպես պատիժ կտրվի ցմահ բանտարկություն: Վերջնական վճիռ դեռ չի կայացվել: