Էրդողանը հայտարարել է, որ Թուրքիան ձերբակալել է ալ Բաղդադիի կնոջը, քրոջը եւ փեսային
ՄԻՋԱԶԳԱՅԻՆ
Չորեքշաբթի Թուրքիայի նախագահ Թայիփ Էրդողանը հայտարարել է, որ թուրքական ուժերը ձերբակալել են «Իսլամական պետություն» ահաբեկչական խմբավորման ոչնչացված պարագլուխ Աբու Բաքր ալ Բաղդադիի կնոջը, քրոջը եւ փեսային, հայտնում է NTV-ն:
«Մենք բռնել ենք թե՛ նրա կնոջը, թե՛ քրոջը, թե՛ փեսային: Ես այս մասին այսօր առաջին անգամ եմ ասում: Մենք նրանց բռնել ենք սիրիական տարածքում»,- ասել է Էրդողանը:
Թուրք առաջնորդը շեշտել է, որ իր երկիրը «կշարունակի վճռականորեն հակազդել ահաբեկչությանը եւ հանրապետության ներկայիս հակաահաբեկչական միջոցառումներն արդյունավետ են ինչպես երբեք»:
Նոյեմբերի 5-ին Էրդողանը հայտնել էր ալ Բաղդադիի քրոջ ձերբակալության մասին: Նա թուրքական միգրացիոն կենտրոնում է մինչեւ դատարանի որոշումը:
ԱՄՆ նախագահ Դոնալդ Թրամփը հոկտեմբերի 27-ին հայտարարել էր ԻՊ պարագլխի ոչնչացման մասին: Նրա խոսքով՝ ալ Բաղդադին ոչնչացվել էր Իդլիբ նահանգում հատուկ գործողության ընթացքում: Թրամփը գործողության անցկացմանն օժանդակելու համար շնորհակալություն է հայտնել Ռուսաստանին, Իրաքին, Սիրիային եւ Թուրքիային: Ռուսաստանի պաշտպանության նախարարությունից հայտարարել էին, որ իրենց տրամադրության տակ չունեն ալ Բաղդադիի ոչնչացման մասին հավաստի տեղեկություններ: Միջազգային հանրությունը ԻՊ պարագլխի ոչնչացումը համարել է կարեւոր, բայց ահաբեկչության դեմ պայքարում ոչ վճռորոշ քայլ՝ կոչ անելով այդ պայքարը շարունակել: