Ինչո՞ւ է թանկացել մսամթերքը. «Աթենքից» պատասխան ստանալ չհաջողվեց
ՀԱՍԱՐԱԿՈՒԹՅՈՒՆՎերջին շրջանում խմբագրությունում պարբերաբար բողոքներ են ստացվում, որ մսամթերք արտադրող «Աթենք» ընկերությունը մոտ 20 տոկոսով թանկացրել է իր արտադրանքը:
«Փաստի» տեղեկություններով, դեռ ամիսներ առաջ այս կազմակերպությունը բարձրացրել է իրացման տոկոսները՝ ցույց տալով, որ վաճառակետերին ամենաբարձր բոնուս-տոկոսներն իրենք են տալիս:
Ըստ տարբեր գնահատականների, դա ունի նպատակ՝ առավել խրախուսել խանութներին՝ առաջին հերթին վաճառել հենց «Աթենքի» ապրանքները:
Սակայն, ըստ ամենայնի, ընկերությունը չի կարողացել «տեղավորվել» նման հավել յալ ծախսերի մեջ և ստիպված է եղել թանկացնել իր ապրանքը, այսինքն՝ իրացման տոկոսները վճարել սպառողի հաշվին: Այս տեղեկությունների հետ կապված մեկնաբանություն ստանալու խնդրանքով դիմեցինք «Աթենք» ընկերությանը:
Նախ՝ մեր զանգին պատասխանած աշխատակիցը, որը ներկայացավ որպես հանրային կապերի գծով մասնագետ, բայց անուն-ազգանունն այդպես էլ չասաց («դա կարևոր չէ»), նշեց, որ ինքն իրավասու չէ պատասխանել մեր հարցերին, իրենց պետը կգա աշխատանքի ու կզանգահարի մեզ:
Երկու օր սպասեցինք, սակայն այդպես էլ չարձագանքեցին: Երեկ նորից զանգահարեցինք, պատասխանեց նույն աշխատակիցն ու ասաց, որ պետը աշխատանքի չի եկել, ու դարձյալ մեր հարցերին պատասխանել չեն կարող:
Ցավում ենք, որ «Աթենքի» ներկայացուցիչների պարզաբանումն այդպես էլ ստանալ չհաջողվեց: