Արմավիրում 23-ամյա վարորդը բերման ենթարկվելիս դանակն սկսել է թափահարել ոստիկանների վրա
ՀԱՍԱՐԱԿՈՒԹՅՈՒՆԱրմավիրի բաժնի ծառայողները այսօր՝ նոյեմբերի 30-ին, ոստիկանության Արմավիրի բաժին են բերման ենթարկել մի քաղաքացու:
Shamshyan.com-ի հաղորդմամբ, ժամը 14:00-ի սահմաններում, Արմավիր քաղաքի Հանրապետության փողոցում ծառայություն իրականացնելիս ոստիկանության Արմավիրի բաժնի ծառայողները նկատել են Mercedes մակնիշի 36 FՍ 589 համարանիշի ավտոմեքենա, որի առջեւի համարանիշը բացակայում էր:
Ոստիկանները՝ ոստիկանության Արմավիրի մարզային վարչության վարչական շենքի հարեւանությամբ կանգնեցրել են ավտոմեքենան եւ վարորդը՝ Արմավիր քաղաքի բնակիչ, 23-ամյա Կարեն Մանուկյանը, սկսել է զազրախոսել իրեն կանգնեցրած ոստիկանների եւ ոստիկանության Արմավիրի մարզային վարչության աշխատակիցների հետ:
Երիտասարդ վարորդին իրավապահները բերման են ենթարկել ոստիկանություն, սակայն նա բերման ենթարկվելու ժամանակ ավտոմեքենայի միջից վերցրել է սառը զենքի նմանվող մի մեծ դանակ ու սկսել թափահարել: Ոստիկաններին հաջողվում է վնասազերծել նրան:
Ավտոմեքենան տեղափոխվում է ոստիկանության Արմավիրի բաժնի պահպանվող հատուկ տարածք, դանակն էլ առգրավվում է: