Իսկ դուք գիտե՞ք՝ ինչպես է աշխատում հակասթրեսային գրիչը

Ներկայումս ավելի ու ավելի շատ մարդկանց ուշադրության կենտրոնում է հայտնվում հակասթրեսային գրիչը: Այն ոչ միայն հակասթրես-խաղալիք է, այլ նաև լիարժեք գրող հարմարանք: Դա կարելի է օգտագործել սովորական գնդիկավոր գրիչի փոխարեն, ընդ որում՝ թանաքը ավարտվելու դեպքում կարելի է փոխել միջուկը: 

Այս արտադրանքն, իհարկե, վերջերս է հայտնվել շուկայում: 

Դրա գյուտարար՝ Ստենֆորդի համալսարանի դիզայնի հետազոտության կենտրոնի աշխատակից, Հոլանդիայում արդյունաբերական դիզայնի գծով մասնագիտացած Միգել Բրունս Ալոնզոն վստահեցնում է, որ գրիչը արձագանքում է իր տիրոջ սթրեսային վիճակին և կարող է օգնել նրան վերացնել այն: 

Ալոնզոն զբաղվում է ինտերակտիվ նյութերի միջոցով վարքի փոփոխության հարցերով և մշակել է մի շարք ինտերակտիվ միջոցներ, որոնք արձագանքում են վարքի արտահայտություններին հետադարձ տակտիլ կապերի և ձևի փոփոխության միջոցով: 

Նրա ստեղծած հակասթրեսային գրիչի գործողության սկզբունքը զգալիորեն տարբերվում է բոլոր այն սարքերից, որոնք, որպես կանոն, սթրեսը հայտնաբերում են մարդու զարկերակը չափելով կամ քրտնարտադրությունը արձանագրելով: 

Գրիչը մարդու մատների շարժումներից «հասկանում» է, որ նա նյարդայնանում է, քանի որ, օրինակ՝ սթրեսի դեպքում անձը սկսում է այն նյարդային սեղմել,  շարժել կամ պտտել: Այնուամենայնիվ, կան դժվարություններ մարդու վիճակը որոշելու հարցում, քանի որ ձանձրացող անձը և սթրեսային վիճակում գտնվող անձը գրիչի հետ վարվում են ճիշտ նույն կերպ: 

Ակնհայտ է, որ գրիչը չի կարող տարբերակել այս երկու վիճակները: 

Այդուհանդերձ, ինչպե՞ս է հակասթրեսային գրիչը օգնում իր տիրոջը հանգստանալ: 

Գրիչի ներսում ներկառուցված են էլեկտրամագնիսներ և շարժման տվիչներ: Եթե շարժման տվիչները ձեռքի շարժումներն ընդունում են որպես սթրեսային, ապա ակտիվանում են էլեկտրամագնիսները, ինչը և խոչընդոտում է նման շարժումները և թույլ չի տալիս գրիչի սեփականատիրոջն անիմաստ շարժել այն: 

Արդյունքում օգտագործողն սկսում է ինքն իրեն հանգստացնել և դադարեցնել նյարդային շարժումները: Ալոնզոն կարծում է, որ գրիչը նման կերպ թույլ է տալիս մարդուն հանգստանալ և թեթևացնում է նյարդային լարվածությունը: 

Էլեկտրամագնիսներն անջատվում են այն բանից հետո, երբ գրիչի սեփականատիրոջ կողմից նյարդային շարժումները դադարեցվում են: 

Հակասթրեսային գրիչի նման հանգստացնող ազդեցությունը հաստատվում է նաև փորձարկումներով: 

Պարզվել է, որ փորձի մասնակիցների կողմից սովորական գրիչի փոխարեն հակասթրեսային գրիչ օգտագործելու ժամանակ սրտի բաբախումը միջինից 5% ցածր է լինում, ինչն էլ փորձի արդյունքները գնահատում է որպես դրական: 

Ստացվում է, որ հակասթրեսային գրիչը, կարծես, իրոք հակասթրեսային էֆեկտ ունի: 

Նյութը հրապարակման պատրաստեց Past.am-ը