Չեն փակվում, բայց դառնում են մասնաճյուղեր. «Փաստ»

«Փաստ» թերթը գրում է․ 

Հանրային քննարկման է ներկայացվել մի նախագիծ, որով առաջարկվում է արյան ծառայության մարզային 5 ստորաբաժանում` «Հրազդանի մարզային արյան բանկ», «Արմավիրի մարզի արյան փոխներարկման կայան», «Լոռու մարզային արյան փոխներարկման կայան», «Գյումրիի արյան փոխներարկման կայան», «Սյունիքի մարզային արյան փոխներարկման կայան» ՓԲԸ-ները միացնել Յոլյանի անվան արյունաբանական կենտրոնին։ 

Նշվում է, որ նախագծի մշակման համար հիմք են հանդիսացել 2018 թվականին նախարարության իրականացրած ուսումնասիրությունները, որոնց արդյունքում պարզվել է, որ գործող կայանները վատ վիճակում են, դրանց բացարձակ մեծամասնությունը չի համապատասխանում սահմանված նորմերին ինչպես շենքային, այնպես էլ սարքավորումային և սանիտարական նորմերի պահպանման տեսանկյունից: 

Բացի շենքային և սանիտարական պայմանները, ուսումնասիրվել է՝ կայաններում քանի մարդ է աշխատում, քանիսն են թոշակառու, քանիսը՝ վարչական մասի աշխատակիցներ: 

Միևնույն ժամանակ նշվում է, որ ֆիզիկապես արյան ծառայության մարզային ստորաբաժանումները չեն փակվելու, այլ գործելու են որպես արյունաբանական կենտրոնի մասնաճյուղեր կամ բաժանմունքներ, ունենալու են միանման կառուցվածք և հաստիքացուցակ: 

Նախարարությունը կարծում է, որ այս նախագծի ընդունումը կնպաստի հավաքված արյան և դրա բաղադրամասերի որակի և անվտանգության ապահովմանը, արյան և դրա բաղադրամասերի ռացիոնալ օգտագործմանը և խոտանի նվազեցմանը: 

Մանրամասները՝ «Փաստ» թերթի այսօրվա համարում։